Eto’o hapana kwaunoenda: Fecafoot
SANGANO reCameroon Football Federation (Fecafoot) rakaramba kugamuchira tsamba yaSamuel Eto’o uyo aida kusiya basa rekutungamira boka iri.
Eto’o, mumwe wevatambi venhabvu vakaita mukurumbira kubva kuCameroon uye akanwisa ka56 pamitambo 118 yaakatambira nyika yake.
Mushure mekusendeka shangu dzenhabvu — izvo zvakamuona achitambira zvikwata zvinosanganisira Barcelona, Inter Milan neChelsea akakwanisa kuhwina mikombe inosanganisira Champions League katatu neAFCON kaviri — akazogadzwa pachigaro chemutungamiri weFecafoot munaZvita 2021.
Zvisinei, hutungamiri hwake hwange husiri kufamba chaizvo mumakore maviri adarika nekuda kwezvikonzero zvakasiyana.
Semuenzaniso, Eto’o anonzi ane daka risingapere nemubati wepagedhi Andre Onana izvo zvaona mutambi weMan United uyu asingaonane nevatambi vazhinji veCameroon.
Daka iri rakaona mutambi uyu (27) achidzingwa kubva muchikwata cheCameroon icho chaive kuWorld Cup mugore ra2022.
Izvi zvakazoona mutambi uyu achisendeka jezi rekutambira nyika yake asi akazoshandura pfungwa dzake akadzoka.
Akabatanidzirwa munyaya yemhirizhonga nemumwe mutsigiri wenhabvu kuQatar, ukuwo bepanhau reThe Athletic rinotaura kuti Eto’o nevashandi vake vepedyo vari kupomerwa mhosva yehuwori yekutengesa mitambo, hudzvanyiriri achishandisa masimba ake zvisina kunaka, kutyisidzira vamwe, kukurudzira mhirizhonga nekufambisa mashoko enhema munyika yeCameroon uye zvinonzi CAF iri kuongorora nyaya idzi.
Eto’o nemagweta ake vakamboramba nyaya idzi dzaitenderera vachiti “mashoko enhema”.
Zvichakadaro, akabvuma mhosva yekubiridzira mutero mari inosvika $3.8 miriyoni munaChikumi 2022 izvo zvakabuda panyaya yekushandiswa kwemifananidzo yake (image rights) ari kuBarcelona.
Eto’o akapihwa mutongo wekugara mujeri kwemwedzi 22 iyo yese yakasendekwa parutivi ndokubhadhariswa faindi ye$1.8m (£1.4m).
Zvakadaro, muchinyorwa chakatumirwa musi weMuvhuro, Fecafoot yakazivisa kuti yakaramba kugamuchira kuti Eto’o asiye basa.
“Executive Committee yeCameroon Football Federation yakaita musangano musi weMuvhuro uno, Kukadzi 5 kuYaounde Hilton Hotel,” inodaro Fecafoot.
“Chirongwa chaive chakanangana nekuongorora matambiro echikwata chenyika chevarume kumakwikwi e2023 Africa Cup of Nations kuIvory Coast.
“Pakutanga kwemusangano, mutungamiriri weCameroon Football Federation, Eto’o Fils Samuel, akasiya basa pamberi penhengo dzemubatanidzwa wefederal executive organ ndokukoka vamwe vese kuti vamutevedzere.
“Pakupera kwemusangano wedu nedzimwe nhaurirano dzakazotevera, nhengo dzeexecutive committee dzakabvumirana kuramba vachishanda basa ravo ndokuramba kugamuchira tsamba yemutungamiriri yekuda kusiya basa.
“Nekudaro vakarakidza kuti vanoda kuramba vane chivimbo maari kuti arambe achienderera mberi nekusimudzira nhabvu yemuCameroon pamatanho ese sezvakarongwa muchirongwa chake chakagamuchirwa nesarudzo General Assembly yaZvita 11, 2021.” − SportsMail Football.