Zvibvunze usati warasa marara
DAMBUDZIKO revanhu vanorasira marara posepose iguru mumadhorobha nemaguta munyika muno, kunyanya muHarare.
Marara ari kungorasirwa munzvimbo dzisina kukodzera izvo zvine njodzi yekukonzera kunyuka kwezvirwere zvemanyoka zvinosanganisira cholera.
Pari zvino cholera iri kupararira kumatunhu akawanda enyika uye denda iri rinonzi riri kunetsa muHarare nekuManicaland.
Cholera chirwere chinokwanisika kudzivirirwa sezvo chichikonzerwa nehuchapa.
Hurumende nemapoka anosanganisira Environmental Management Agency (EMA) vari kushanda siku nesikati kuona kuti nharaunda dzagara dzakachena uye donzvo guru riri rekudzivirira kunyuka kwezvirwere.
Nguva pfupi yadarika, Hurumende yakaparura chirongwa che”Operation Chenesa Harare” chakananga kuona kuti nharaunda dzinogara dzakachena.
Chirongwa ichi chiri kubatsira zvakanyanya mukuchenesa guta iri kusanganisira nzvimbo dzinogara veruzhinji.
Asi chinoshamisa ndechekuti zvisinei nebasa guru riri kuitwa neHurumende yakabatana nemamwe mapoka, kune vamwe vanhu vasina hanya avo vanoramba vachirasira marara pose-pose.
Ichi ndicho chikonzero Hurumende munguva pfupi inotevera iri kuda kudzika mutemo unoranga zvakaomarara vanhu vanorasira marara panzvimbo dzisina kukodzera nevemakanzuru vasingatakure marara nenguva.
Pasi pemutemo mutsva uyu, vemakanzuru vasiri kutakura marara munharaunda vachabhadhariswa faindi yeUS$5 000.
Nerimwewo divi, vanhu vanorasira marara pose-pose vachabhadhariswawo faindi yeUS$500 kana kugara mujeri kwemwedzi mitanhatu.
Izvi zviri mugwaro remutemo reStatutory Instrument (SI) iro richaitawo kuti chirongwa chekuchenesa nyika, icho chinoitwa neChishanu chekutanga chemwedzi, chive chisungo uye vasingachitevedze vachabhadhariswa faindi yeUS$2 000.
Kune vamwe vanhu vanogona kuona sekuti faindi yeUS$500 yakawandisa kuti munhu aibhadhariswe kana abatwa nemhosva yekurasira marara pose-pose.
Asi semaonero edu, Hurumende yakauya nematanho aya mushure mekuona kudzika midzi kwaita dambudziko revanhu vanorasira marara munzvimbo dzisina kukodzera uye njodzi yekukonzera kupararira kwezvirwere zvakadai secholera.
Munhu ane pfungwa dzakati kwesere haangorasira marara pose-pose uye iyi imhosva inoparwa nekuda kwekushaya hanya kuti nharaunda igare yakachena.
Faindi yeUS$500 inoita kuti munhu afunge katatu asati arasira marara panzvimbo isina kukodzera.
Nerimwewo divi, zvakakoshawo kuti makanzuru emaguta nemadhorobha aone kuti mabhini aripo zvekuti munhu haapedzisire ave kufamba chinhambwe chakareba akangobata marara mumaoko achishaya pekuarasira.
Vemakanzuruwo ngavaite basa sebasa nekutakura marara nenguva yakafanira kwete kuti anosvika pakuwora nekuve njodzi kuutano hweveruzhinji nekushaya anotakura.
Nyaya yekuchengetedza hutsanana nekuchenesa nharaunda ibasa remunhu wose nekudaro zvinoda kuita muonerapamwe sechuma chemuzukuru.
BASA rekuvakwa kwezambuko reMbudzi Traffic Interchange, muHarare rinonzi rinotarisirwa kupera munaChikunguru gore rino