‘OOG OP ALLES — WAAR JY OOK AL IS’
“Ons jongste tegnologie is FieldView wat aan Precision Planting se stelsels gekoppel is. Dit stel ons in staat om intyds, via ’n iPad, na ál die funksies en sensors op ons planters te kyk. Dit versamel ook belangrike data van werktuie en masjinerie wat ons dan kan gebruik om voorskrifkaarte vir ons saailande te ontwikkel en om veranderlike toedienings vir bedrywighede soos plant, die strooi van kalk en bemesting te programmeer.
“Dit sluit alles aan by ons Case IH Advanced Farming Systems-programme sodat alle gekarteerde data, soos vanaf roostermonsters, opbrengskaarte en kunsmiskaarte, versamel en gesentraliseer kan word vir ontleding. Dit stel ons in staat om probleme te identifiseer en dan gepaste reaksies te verfyn om die verlangde regstellings en verbeterings te bereik. Dié reaksies sluit in proaktiewe langtermynbeplanning, soos die identifikasie van en aanpassing by verwagte veranderinge in die klimaat, grond, kultivars en grondproduktiwiteit in selfs spesifieke dele binne ’n landery.
“Dié stelsels en hul data help ook om produksiekostedoeltreffendheid en opbrengste te maksimaliseer deur die presisie te bereik om die oorvleuelde toediening van saad, kunsmis en chemiese middels te voorkom, asook by enige ander meganiese vereistes.
“Ons kan ook historiese en huidige data vergelyk om te sien waar ons verbeter het en waar ons nog moet verbeter. Dit geld ook waar ons geld maak en waar ons dalk die opbrengs op belegging moet verbeter.
“Selfs al is ons nie op die plaas nie, kan ons steeds ons iPads gebruik om data van byna ál ons werktuie en masjinerie van ’n afstand te monitor en waar te neem. Ons weet ook wat gebeur met die plase se weer, grondvog en besproeiing op ’n gegewe oomblik.
“Ons kan dadelik ’n masjienoperateur of ’n ander werker bel om ’n probleem reg te stel wat ons van ’n afstand op die iPad opgemerk het.”