5 VRAE AAN MATTHEW DAVIS, HOOF VAN HOMMELTUIGBEDRYWIGHEDE BY AEROBOTICS
1 Hoe sien jy die toekoms van hommeltuie in die landbou?
Hommeltuie sal toenemend belangrik wees. Namate hulpbronne, soos water en grond, skaarser word en die koste van produksiemiddele, soos kunsmis en arbeid, styg, raak dit broodnodig vir boere om doeltreffender te boer. Presisielandbou, in groot én klein ondernemings, is ’n manier om dit reg te kry en seker te maak die hulpbronne word ten volle benut en gebruik waar dit die nodigste is. Hommeltuie is belangrik vir presisielandbou, of dit die monitering van gewasprestasie deur lugbeelde en spektrale inligting, die toediening van produksiemiddele of die doeltreffender bekamping van onkruid is.
Presisielandbou vereis kennis van elke produksie-eenheid op jou hele plaas. ’n Boer het ’n paar opsies, maar beeldvorming (imagery) is ’n kragtige manier om op groot skaal data in te samel. Grondvogmeters kan die doeltreffendheid van besproeiing meet, maar hul metings is baie gelokaliseerd. By Aerobotics gebruik ons termiese hommeltuigbeelde om ’n transpirasiewaarde vir elke plant te verskaf. Dit maak dit maklik om die eenvormigheid van besproeiing te meet en potensiële probleme te identifiseer. Dit hoef ook nie die een of die ander te wees nie. ’n Geïntegreerde benadering beteken boere kan die beste liggings vir hul vogmeters en ander sensors kies met die hulp van hommeltuig-gegronde prestasiesones.
2 Watter nuwe toepassings vir hommeltuie is op pad?
Hommeltuie doen nou al ’n klompie jare lank bespuitings, maar in ’n wêreld waar die mark ál meer organiese produksie en laer koolstofdioksiedvrystellings vereis, sal boere gewasse moet kan produseer met min tot geen chemiese residuvlakke.
Biologiese middels, veral voordelige insekte, speel ’n kernrol in ’n geïntegreerde benadering om plae doeltreffend te bestry. ’n Nuwe en opwindende toepassing vir hommeltuie is om hierdie voordelige roofinsekte te versprei. Ons het onlangs Skybugs in vennootskap met FieldBugs van stapel gestuur. Hommeltuie laat boere toe om die insekte eenvormig en uiters presies te versprei. Die insekte bereik digte gewasse en die toppe van groot bome op enige terrein baie beter as wanneer dit met die hand versprei word. Ons het die tegnologie op die proef gestel. Die resultate het gewys dit is ’n tyd- en kostedoeltreffende oplossing om roofinsekte 25 keer vinniger te versprei. ’n Hommeltuig kan 200 hektaar per dag dek.
3 Enige nuwe neigings met harde- of sagteware?
Namate die reeks hommeltuie op die mark toeneem, neem mededinging tussen verskaffers toe. Dit lei tot beter gehalte en koppelvlakke wat eenvoudiger is om te gebruik. Dit maak dit dus toegankliker vir boere om hul eie hommeltuie te besit en te bedryf.
Ons sien ook beter kamerategnologie by bekostigbaarder hommeltuie, wat toegang tot hoëresolusie- multispektrale beelde verbeter.
4 In watter bedrywe maak hommeltuie die grootste impak?
Hommeltuie voeg tans baie waarde toe tot opnames en inspeksies. Dit kan voorwerpe inspekteer wat moeilik of gevaarlik is vir mense, soos telefoonpale, kragsentrales, windturbines en myne. Ons meen die landbou kan nóg meer waarde daaruit put. Ons het onlangs ’n paar ouditvlugte onderneem om die boomgesondheid te meet ná rampe. Ons verskaf dan binne ’n paar dae data wat tot sekere aksies kan lei.
5 Is daar beperkende faktore?
’n Paar struikelblokke pootjie hommeltuie in die landbou. Regulering en lisensiëring kan ’n beperkende faktor wees. In sommige lande is die bedryf heeltemal oorreguleer en dit is baie duur en moeilik vir hommeltuigvlieëniers om behoorlik gesertifiseer te word.
Die toerusting, soos hommeltuie en die gespesialiseerde kameras of toerusting, kan ook baie duur wees. Sommige karteringsopsette kan tot R500 000 kos.
Ons hoop die groeiende mededinging tussen hommeltuigverskaffers beteken daar gaan in die toekoms meer bekostigbare opsies wees.
Laastens is ’n klompie boere nog huiwerig oor hommeltuie en besef nie hoeveel tyd en hulpbronne hulle kan bespaar nie.