Vernuwende tegnologie trek aandag
Verskeie nuttige hulpmiddels vir Suider-Afrikaanse boere, plaasbewoners en jagters is in die afgelope jaar of wat beskikbaar gestel. Alle pryse sluit BTW in, en is soos met die bekendstelling.
VERSPREI ORGANIESE MISSTOF BETER
Die Lemken Heliodor word nou met ’n voorbereidingstelsel toegerus wat dit moontlik maak om ’n Vogelsang DosiMat DMX-presisiemisstrooier bo-op die eg te heg.
Die kombinasie van twee bewese werktuie is ideaal vir die presiese en laeverliesverspreiding van organiese kunsmis, wat dan deur die eg in die grond ingewerk word. Die Heliodor bied ’n goeie grondslag vir die toediening, aangesien dit kompak en laag is en dus min bykomende druk op die trekker se optel- en trekvermoë plaas.
Die DosiMat DMX is bekend om sy doeltreffende dwars- en lengteverspreiding wat konsekwent gehandhaaf word, selfs teen uiters lae en hoë toedieningskoerse.
Die manier waarop die twee werktuie saamwerk, is eenvoudig: Mis word van bo in die DosiMat gevoer, binne-in die toestel gehomogeniseer deur ’n vloei-geoptimaliseerde rotor wat met snylemme toegerus is, en dan in die individuele afsetpunte gestoot. Vesel en ander materiaal word tydens die proses opgekerf. Dit stel die werktuig-duo in staat om die gewenste presiese verspreiding te behaal en help om verstoppings te voorkom. Die mis gaan dan deur pype na agter die eerste ry skywe op die Heliodor, waar dit in die grond ingespuit en onmiddellik deur die tweede ry skywe van die sleeproller toegegooi word.
Die Heliodor-DosiMat-duo is in pas met huidige neigings. Stygende kunsmispryse dwing boere om na ander, meer organiese opsies te kyk. Deur die mis onmiddellik ná toediening in die grond in te werk, word stikstofverliese verminder.
Só is die proses nie net ekonomies nie, maar word waterbronne ook beskerm. PRYS: Op aanvraag.
NAVRAE: Me. Monica Shears, Lemken, 012 993 5929.