Presisietegnieke maak nuwe wêreld oop met grondbewerking
Varieerbare tegnologie, van bemesting tot plant, het ’n nuwe stap vorentoe geneem met die ontwikkeling van ’n stelsel vir wisselende grondbewerking. Só kan ’n egaliger saadbedding geskep word om vinniger en noukeuriger te plant. Tegnologie was by die Comm
Die koms van tegnologie vir wisselende toediening het boerdery kostedoeltreffender gemaak en opbrengste verbeter. Dit behels dat ’n landery nie as homogeen beskou word nie, maar in sones opgedeel word om kunsmis so doeltreffend moontlik toe te dien of verskillende kultivars teen wisselende digthede aan te plant.
Die volgende stap, dié van ’n varieerbare grondbewerkingswerktuig wat die wisselende grondtoestande in een landery in ag neem en blitsvinnig outomatiese veranderinge kan aanbring terwyl die grond bewerk word, is vroeër vanjaar op die Commodity Classic-landbouskou deur die landboumasjinerievervaardiger
Case IH ten toon gestel.
Die stelsel, AFS Soil Command, bou voort op Case IH se Advanced Farming Systems- (AFS) stelsel wat op sy planters, spuite en stropers gebruik word.
Die AFS Soil Command se saadbedding-interpretasietegnologie is die eerste in sy soort wat boere in staat stel om die agronomiese gehalte van ’n landery se saadbedding vanuit die trekker se kajuit te meet en te verbeter. Deur sensors wat op elke tand geplaas word, word inligting intyds na die skerm in die trekker deurgegee, van waar veranderinge aangebring kan word om ’n onegalige saadbedding, wat kan veroorsaak dat die plantereenheid opwip wanneer geplant word, te vermy.
GROTER PRODUKTIWITEIT
Dr. Alison Bryan, ’n navorsingslandboukundige vir Case IH, het op die Commodity Classic gesê die bewerkingstoerusting bied vir die eerste keer ’n blik op landboutoestande wat voorheen onsigbaar was. Dit bied aan boere die vermoë om dinamies daarby aan te pas.
“Met AFS Soil Command en saadbeddingtegnologie kan onmiddellike veranderinge gemaak word terwyl inligting versamel word. Dié inligting kan dan direk na jou planter deurgetrek word.”
Die stelsel kan op verskeie maniere gebruik word, onder meer om saadbeddinggehalte te verbeter, bewerkingsvoorskrifte vir beter sonebestuur op te stel en uiteindelik beter produktiwiteit
en doeltreffendheid te bewerkstellig.
Om die doeltreffendheid van die stelsel te toets, het Case IH ’n deurlopende proefproses gevolg. Bryan het gesê in een geval het navorsers die Case IH Tiger-Mate 255-werktuig saam met die AFS Soil Command-tegnologie gebruik om die gehalte van die saadbedding te monitor.
“Die Tiger-Mate meet hoeveel beweging in die arm en skaar plaasvind. Meer beweging beteken meer onegaligheid in die saadbedding. Hoe glad of ongelyk die saadbedding is, gaan weer ’n impak hê op hoe die planter die saad plaas. Dus kan die bewerking en planterverstellings aangepas word volgens die terugvoer van die saadbeddingsensor.
“Daar kan vinniger gewerk word op plekke waar ’n beter saadbedding gemaak word. AFS Soil Command laat boere toe om verstellings te maak en daarna voorskrifkaarte te skryf vir hul lande, gegrond op die inligting wat deur die tegnologie verkry is.”
Benewens bewaringslandboupraktyke het navorsers ook na konvensionele produksiepraktyke gaan kyk om te verseker dat die stelsel so doeltreffend moontlik is.
“In die geval van bewaringslandbou is die True-Tandem 335VT- vertikale grondbewerkingswerktuig gebruik, terwyl grondverdigting, wat gewoonlik deur konvensionele praktyke aangepak word, deur die Ecolo-Tiger 875-skottelskeurploeg aangepak is.”
BRANDSTOF BESPAAR
Hoewel die werktuie verskillend werk, kan albei presisietegnologie gebruik, het Bryan gesê. Op plekke waar erosie kan voorkom, het navorsers byvoorbeeld nuldiepte as deel van die voorskrif ingestel.
“Slegs die oppervlak is in hierdie geval gekrap. Dit het meer oesreste op die oppervlak beteken en dus ’n beter deklaag bewerkstellig.”
Die stelsel kan ook outomaties die bewerkingsdiepte van die werktuig verander na gelang van die tipe bewerking wat benodig word en die verskillende grondtipes wat in die landery voorkom.
Om die doeltreffendheid en produktiwiteit van die stelsel te toets, het Bryan en haar span navorsers die Ecolo-Tiger 875 en ander konvensionele grondbewerkingswerktuie ingespan.
“Ons het voorskrifte geskep met spesifieke grondbestuursones en daarna die landery in twee verdeel met die voorskrifdieptes op een helfte en ’n tradisionele, konstante bewerkingsdiepte op die ander helfte.
“Die resultate is daarna met mekaar vergelyk om die doeltreffendheid van brandstofverbruik te meet. Wanneer vlakker gewerk word, word minder krag en dus minder brandstof gebruik, terwyl daar ook vinniger gewerk kan word.”
Wat die navorsers bevind het, was dat daar byna ’n 10%-verbetering in produktiwiteit oor die eersgenoemde sowat 81 ha was. Navorsing het reeds bewys dat verdigting tot ’n opbrengsverlies van 20% kan lei, na gelang van die grondsoort en die graad van verdigting.
Dus help die voorgeskrewe presisiegrondbewerkingstegnologie nie net om verdigting te verlig nie, maar dit kan ook produktiwiteit verbeter.
WAARDE VIR DIE BOER
Mnr. Darren Hefty, ’n landboukundige, boer, mede-eienaar van die landbouinsetmaatskappy Hefty Seed en aanbieder van die multiplatform-inligtingsprogram AgPhD, het self die nuwe stelsel gaan toets. Hy sê die resultate is bemoedigend.
“In die eerste plek verander grondbewerkingsvoorskrifte elke deel van ’n landery in die perfekte omgewing vir die gewas wat verbou gaan word. Ongeag die bewerkingspraktyk, hetsy konvensioneel, minimumbewerking of geenbewerking, kan die verlangde hoeveelheid oesreste, die grondbewerkingsintensiteit, die saadbeddingtoestand en noukeuriger saadplasing verkry word.”
Hy sê die stelsel bied ’n visuele manier om die inligting wat ingesamel is, te interpreteer, terwyl dit trekkerbestuurders van wisselende vaardigheidsvlakke in staat stel om elke landery reg te bewerk.
“Laastens bespaar die AFS Soil Command-stelsel tot 10% brandstof, terwyl die verskillende sones in die landery outomaties volgens die voorskrif bewerk word. Dit verminder ook slytasie, aangesien die grondtoestande in ag geneem word.”
Volgens Hefty het die gebruik van die AFS Command Soil-stelsel hom in staat gestel het om tot twee skepels (50 kg) per acre (0,4 ha) meer mielies te oes.
“Teen ’n prys van $4 per skepel beteken dit ’n ekstra $8 000 (sowat R137 000) per jaar wat nie net vir die installering van die stelsel betaal nie, maar wat jaar ná jaar ’n bykomende inkomste beteken. Dit maak vir ons dus net sin om die volgende stap in presisieboerdery te doen.”
Dit is nie bekend wanneer die stelsel in Suid-Afrika beskikbaar sal wees nie. t
Gerrit Bezuidenhout se besoek aan Amerika is moontlik gemaak deur ’n borgskap van Case IH.