ILHAAM SE WENKE VIR OPKOMENDE ENTREPRENEURS:
1 ’n Besigheid soos hare verg nie altyd ’n reuse-kapitaalbelegging nie. Sy sê die fokus moet eerder op ’n positiewe ingesteldheid wees, om jou vaardighede daagliks te slyp, en jou niche en sterkpunte te identifiseer.“Streef na wat jy geniet, want passie en werkbevrediging is duidelik aan jou kliënte.”
2 Dan kan jy ook leiding soek van mentors en kundiges wêreldwyd deur gratis webinars, betaalde kursusse of e-boeke. En soek na‘n kombinasie van wenkbroukuns én die sake-aspek daarvan.
3 Sy sê ’n realistiese vision board wat jou doelwitte in die kort- en langtermyn opsom, kan baie help om dié proses rigting te gee.“En hierdie metode maak dit makliker om dop te hou.”
4 Belê in hoëgehalte-toerusting, soos ’n goeie kamera of mobiele toestel.
5 Vertrou jou instinkte. Stel van die begin af sake-grense, sê Ilhaam.
6 Lei jouself deurlopend op deur na bedryfsverwante podcasts te luister en op hoogte te bly van trends en kursusse. 7“Geduld en vertroue is belangrik, en onthou: Jy’s net so goed soos jou laaste poging. Fokus op elke kliënt se behoeftes om lojale, herhalende kliënte op te bou.”
8 Beskerm jou besigheid en tyd deur beleide van die begin af te implementeer, soos fooie vir klante wat nie opdaag nie, of laat kanselleer.
“’n Outomatiese aanlynbesprekingstelsel kan jou besprekings beter laat verloop, en skep ’n webwerf of Googlelisting om jou aanlyn teenwoordigheid te verbeter.”
9 Sy sê jy moet getrou wees aan jouself en jouself vergewe vir enige foute langs die pad – dis deel van die groeiproses. “Nie elke kliënt sal jóú kliënt wees nie, maar streef altyd daarna om jou beste te doen.”
10 Sy sê terugslae is nie persoonlik nie, maar jy moet aanspreeklikheid aanvaar en verbeter langs die pad.
11“En die belangrikste: Plaas volle vertroue in die Almagtige. Behandel ook jou verskaffers, kollegas en personeel met respek en onthou dat deurlopende liefdadigheid jou rykdom sal suiwer, en meer deure vir jou sal oopmaak.”