Abashushiswe abancela igazi losomabhizinisi
IDINGA ukusukunyelwa ngokushesha inkinga yokwanda kwamaqembu ezigelekeqe ezincela igazi losomabhizinisi ngokubafuna ngenkani “imali yokubavikela”.
Sekunesikhathi lo mkhuba ungalawuleki futhi sewusabalele izwelonke. Kudalo bekwaziwa ukuthi wumkhuba wasembonini yamatekisini. Udlulele ekuvinjezelweni kwabamathenda okwakha befunwa u-30% wemali yomsebenzi ngabantu ababizwa nge-construction mafia.
Ukudlebeleka kwabenza lobu belelesi, kugcine sekunabele ekuhlukumezeni abezitodlwana emalokishini. Kuthe kusabatshazwa lokhu badlulela kwabemiqasho - ogalakajana befuna ukuhleshulelwa futhi bezigawulela bona imali abayifunayo.
Okukhexise abaningi, kube wukuhlaselwa kwabesifazane abazizamela impilo ngamatafula abadayisa izithelo nezinye izintwana ezingatheni emigwaqweni esemadolobheni. Nakhona izigelekeqe kazinamahloni okumunca igazi labo, zifuna ngodli imali eziyithandayo.
Kwabanye kuphume imiphefumulo, bebulawa ngenxa yokungavumi ukuxhashazwa. Abanye banqume ukuduba amabhizinisi abo. Lo mkhuba uyakhonjwa nasemaphoyiseni. Kuthiwa kukhona ayizikhohlakali okuthi nxa umuntu engenayo imvume yokuhweba ngokuthile wona amkhokhise “imali yokuvikelwa” esikhundleni sokuthi aphoqelele ukuthotshelwa komthetho. Lokhu kukhomba ukujula nokusabalala kwale nkinga.
Kudingeka amaphoyisa aqotho asukumele phezulu ukulwa nalesi sihlava. Akuqhanyukwe ngokushesha nezinhlelo ezicacile zokuthi le nkiyankiya isukunyelwa kanjani.
Ukuyekelelwa kwalobu bugebengu kuzokuba nomthelela ongemuhle emnothweni wezwe ngoba nabatshalimali bazobaleka. Inselelo isebuholini bamaphoyisa ngokwenza isiqiniseko sokuthi umbutho ubuyelwa ukwethenjwa nesithunzi ngokuthi kuboshwe futhi kushushiswe ngempumelelo izephulamthetho.