Umndeni ubonge ababulewe ngokuba ‘yimihlatshelo’
BAFANISWE namaqhawekazi asindise impilo yabanye abantu besifazane abangani ababili ababulawe ngesonto eledlule ekenville, ethekwini.
Umndeni kanksz Anele Mbokazi (29) obengumhlengikazi esibhedlela Inkosi Albert Luthuli, ubonge ukuba “wumhlatshelo” kwakhe nomngani wakhe, unksz
Zizipho Gabisa (30) ngesikhathi kunenkonzo yomngcwabo kanksz Mbokazi e-oakford, everulam, ngomgqibelo.
Unksz Gabisa, obengusokhemisi esibhedlela esizimele emhlanga, naye ungcwatshwe ngomgqibelo e-eastern Cape, lapho umndeni wakhe udabuka khona.
Enkonzweni yomngcwabo kanksz Mbokazi ebihanjelwe yizinkumbi zabantu, umamkhulu wakhe unkk P.E Phakathi ufanise abafi namaqhawekazi asindise impilo yabesifazane abaningi ebebesazobulawa abasolwa.
"Emotweni yalaba bafana kwatholwa amaselula abesifazane nezingubo zabesifazane. Kuzona kwakukhona ngisho imvunulo. Inkosi kuphela eyaziyo ukuthi umnikazi wayo uphi noma naye wabulawa ephuma emcimbini," kusho unkk Phakathi.
Udalule ukuthi emiyalezweni eminingi abebeyithola kubantu abehlukene emva kokubulawa kwabafi, kukhona owesifazane obatshele ukuthi uyathuthumela ngoba kwenzeka isigameko nje, naye ubezohlangana nomsolwa wokuqala, umnuz Lungani Mthethwa, ngempelasonto.
"Yebo kubuhlungu kodwa bangamaqhawekazi o-anele. Ukubulawa kwabo nokukhuluma kwegazi labo ngokushesha, okuholele ekubanjweni kwabasolwa, kusindise impilo yabanye abesifazane ebebesazobulawa," kusho unkk Phakathi.
Udadewabo kamufi, unksz Sne Mbokazi utuse unkulunkulu, ethi kwaba yicebo lakhe ukuthi yena nodadewabo omncane, unksz Sisanda Mbokazi basale ngosuku lwesigameko.
"Sibonga unkulunkulu ngoba ngabe silele la sobathathu," kusho unksz Mbokazi ebuka ingqovungqovu yebhokisi elimhlophe likadadewabo, athe bamkhethele lona ngoba minyaka yonke ubehlale edlala ngokuthi uzoshada ngodisemba.
Sekukhuluma ingane kamufi, u-omphile Mbokazi (10), inqwaba ivukwe umunyu ngesikhathi ithi: “Ngiyohlezi ngikuthanda mama, uhambe kahle, ungigade lapho ngikhona.”
Encwadini efundwe unksz Mbokazi (Sne) ebibhalwe unina, unkk E.S Mbokazi, uveze ukuthi awukho umzuzu obe nzima njengowokuqinisekisa ukuthi umufi akasekho.
“Ungathi ngiyakuzwa Anele, usumemeza (kubasolwa) usuthi ‘hawe ma ngixoleleni! Ingane yami!’, umbhobho wesibhamu usubheke kuwe,” kusho unkk Mbokazi encwadini, lapho ebuye wabalisa khona ngokuthi umuntu wesifazane ufa kanjani ngesibhamu?
Zonke izikhulumi bezivumelana ngazwi linye ukuthi umufi ubewumuntu onothando emndenini wakhe nakuwo wonke umuntu abehlangana naye. Bathi ubeyilwela into ayifunayo, futhi enenkani, engavumi ukwenziswa into angayifuni.
Abasolwa kuleli cala, omthethwa nomnuz Sandile Chili bayabuyela enkantolo yemantshi yasethekwini ngolwesithathu lapho okulindeleke ukuthi bacele khona ibheyili.