Kusabalwa izinyanga ngokulunga kwenkundla yebay
KUSEKUDE ukuthi ibuyele ekhaya irichards Bay FC ephoqeleke ukushiya inkundla umhlathuze Sports Complex ngenxa yokungabi sezingeni lepremier Soccer League (PSL) kumasizini adlule. Lokhu kuvele izolo imeya kamasipala umhlathuze, uxolani Ngwezi, ikhuluma nabezindaba ngesimo senkundla osekunesikhathi kubhekwe ukuthi kuqedwe ukulungiswa kwayo. Ibay selokhu yanyukela kwibetway Premiership ngo-2022 ayikaze idlale kule nkundla. Empeleni yenyukele kulesi sigaba ivele isebenzisa iking Zwelithini Stadium, emlaza, ethekwini ukudlala imidlalo yasekhaya. IPSL yavala isports Complex ngo-2021 ikhala ngezinto eziningi ezingalungile okubalwa kuzona ukugxaza kwamanzi nezintambo zikagesi ezazihamba phansi. Umasipala umhlathuze wakhipha imali engu-r211 million wokuyilungisa. Ungwezi uthe kuningi okuphazamisile okuholele ekutheni ingaqedwa inkundla ngesikhathi abebesilindele.
“Njengoba sisendaweni egudle ulwandle, izulu lina njalo. Lokho kwenza singakwazi ukuqhubeka nokusebenza. Nyakenye kudingeke silahlekelwe cishe yizinyanga ezintathu ukuze sivumele umengameli wezwe asebenzise le ndawo nge-arm Force’ Day. Kunezinto ebezingenzeki enkundleni ekubeni kwakhiwa kuyona. Lezo zinto zenze kwabambezeleka ukuqhubeka komsebenzi nezindleko ezihambisana nakho ngoba umakhi ngeke asuse zonke izinto zokwakha. Ezinye kufanele zibe lapha futhi abakwazi ukushiya kanjalo. Kodwa idolobha lisazibophezele ukuqeda lo msebenzi okufanele ngabe kade waphela. Inkundla izobe isilungile ezinyangeni ezimbili kuya kwezintathu. Kodwa kuzoncika esimeni sezulu,” kusho ungwezi.
Ukungalungi kwenkundla kugxekwe kakhulu ngesikhathi ibay icishe igawulwa yizembe kwibetway Premiership ekupheleni kwesizini edlule. Inatal Rich Boyz isinde ngokuwina ama-play Offs. Emuva kwalokho, usihlalo wayo, usifiso “Jomo” Biyela, watshela abezindaba ukuthi ngabe benze kangcono ukuba bebedlalela ebay. Ngaphambi kwalokho, ubiyela wayecashunwe ethi unethemba lokuthi inkundla izobe isilungile ngemuva komqhudelwano i-africa Cup of Nations (Afcon) ebisekuqaleni konyaka e-ivory Coast.
“Noma yimuphi umuntu osebenzisa inkundla usebenzisa amanzi nogesi futhi kufanele siyivikele inkundla. Kufanele siqashe abantu abazosebenza enkundleni abazoyihlanza nabazoqinisekisa ukuthi isesimeni esihle. Iqembu uqobo kufanele lizokhuluma nedolobha kusekude siqede ukulungisa inkundla ukuze sizoxoxa ngemigomo nemibandela ukuze sisho ukuthi yilokhu esizokwazi ukukukhokhela nokunye. Akufanele siqale izingxoxo uma inkundla isiphelile futhi sesichithe imali, sesingavumelani ngemigomo nemibandela ekubeni isikhathi sihamba futhi sekukuphuka imimoya emphakathini. Akukho okuvimba izingxoxo phakathi kwethu namanye amaqembu ngoba kunemilford okungeyakhona lapha,” kusho ungwezi.