Ufisa izingoma zakhe zizwakale emafilimini aphesheya
UNEPHUPHO lokuthi izingoma zakhe ezihlanganise amahubo, umbhaqanga, isicathamiya nencekeza zizwakale emafilimini nemidlalo ehlukene phesheya kwezilwandle nase-afrika usikhumbuzo Thabethe wasenkandla.
Ngenyanga ezayo, usikhumbuzo uthi uzokhipha I-EP yakhe yokuqala ethi Imvunge Yakwantu.
Ekhuluma nesolezwe, uthe ukukhulela emakhaya kuculwa izingoma ezehlukene uma kunemicimbi noma ekwaluseni yikhona okumenze wahlanganisa izingoma azozikhipha.
Uthe ngo-okthoba, uzobe eseba nohambo lokwethula I-EP, Kwazulu-natal, Gauteng nasenkandla.
"Ngikhulele emakhaya, ngakho izinsimbi engizihlanganisile kulolu hlobo lomculo engiwenzayo zehlukile. Umculo wesintu awusanakwa kakhulu, ngabona ukuthi ake ngibe ngelinye lamaciko eliwuvusayo. Kukhona imiculo esibonakala ngathi iyona eyisiko manje kodwa kukhona uhlobo lomculo esiwazi emakhaya okuyiwona oyisiko,” kuchaza yena.
Uthe ukungena kwakhe emculweni ukwenze esemdala ngoba abazali bamtshela ukuthi akaqale esikoleni uma eseqedile akhululeke angene emculweni.
“Ubaba ngomunye wabangibhalele izingoma ezikhona ku-ep yami. Kuyangithokozisa ukuthi kuzona zonke izingoma ezikhona abe nesandla. Ngisebenze nabantu abafana nomama utu Nokwe engomeni yami ethi Goba Lugongolo. Siqeda ukuyenza safisa ukuthi ngathi ingezwakala ezindaweni ezifana no-broadway. Lokho kimi kusho lukhulu ngoba kungifundise okuningi ngalolu hlobo lomculo engilwenzayo. Ngisebenze namanye amalungu eqembu lemithente.”
Uthe yize efisa ukuthi izingoma zakhe zigqame phesheya kodwa uyathemba nakuleli kukhona abazojatshuliswa yizona, bese bezibeka kwelinye izinga.
Uveze ukuthi uyakholelwa ekutheni uma kukhona amaqembu afana neladysmith Black Mambazo nesoweto Gospel Choir, umculo wabo ojatshulelwayo phesheya, naye kuzofezeka izifiso zakhe.