Indoda ngeke yashaya umthetho yona ingenamthetho
UMA sifika emhlabeni siyabusiswa ngezinsuku zokuphila, mina ngike ngithi sinikwa ithuba lokwenza okuhle, okungukusiza abantu khona sizokwazi ukuthola izibusiso. Kodwa okubaluleke kakhulu ukushiya umlando omuhle. Phela iyona ndlela le esokhunjulwa ngayo umphakathi nezizukulwane.
Kulijoka lawo wonke muntu ukuthi uma kukhulunywa ngomlando wakho engathi kungakikizwa, kukhuzwe izibongo nezithakazelo zakho. Lokho kuyinkomba yokuthi ngesikhathi usadla anhlamvana, wenze kahle, waphatha kahle abantu, okuchaza ukuthi ufundile, wafundisa okuhle ngaso sonke isikhathi.
Ngithi ake ngisike elijikayo, sesithinta isihloko sokugcina esibhekiswe emadodeni ngojulayi njengoba sigubha inyanga yawo futhi sidodisana. Esinye sezinyathelo ezibalulekile nezakhayo endodeni, yisinyathelo sokuba nomndeni, iganwe - uma kwenzeka - ibusiswe ngabantwana ize ibhanselwe ngabazukulu nezizukulwane.
Konke lokhu kuyahlelelwa, siphinde sibe nejoka lokuhlela ukuthi mhla sesendele kobabamkhulu sesihleli nokhokho - laba abasele kufanele basale bondliwe.
Ubudoda buthi asibashiye nemali abazoziphilisa ngayo, izimfundiso ezinhle nezakhayo. Akube yithina madoda esiba yizibonelo ezinhle emakhaya nasemphakathini. Awukho umuzi okhuliswa nge-groove, awukho umuzi okhuliselwa kude, awukho umuzi okhuliswa nge-remote control, awukho umuzi okhuliswa umthetho ungekho. Ukugcina nokuhlonipha lowo mthetho kuqala ngathi madoda.
Awukwazi ukuthi izingane azingabuyi ebusuku kodwa wena uphambana ushayisane nabathakathi ngezifuba bebuya kosebenza. Ukuhlonishwa komthetho kuqala ngawe.
Yazi kabanzi ngemithetho yemishado:
Imishado yamanje isithanda ukuba nemixhantela eminingi, ikakhulukazi kulaba bantu ababizwa ngosomabhizinisi, nokwenza kube mqoka ukuhlela izinto zakho ngaphambi kokuthi uthumele abakhongi.
Izinhlobo zemishado:
Ukhetha owodwa kule mishado ekhona; i-civil Marriage Act, lo okuthiwa umshado omhlophe, i-recognition of Customary
Marriages Act, sokhumbula ukuthi ilowo kuphela ongathatha khona isithembu, bese kuba i-civil Union Act, wona obhekelele abafowethu nodadewethu abathandana nobulili obufanayo.
Imigomo nemibandela yemishado:
Uthi uma usukhethile uhlobo lomshado bese ukhetha uhlobo lomgomo nombandela ozosebenza kulolo hlobo lomshado.
Sokhumbula ukuthi zintathu izinhlobo zemigomo nemibandela emshadweni; ohlanganisile amafa (In-community of property) ohlukanisile gelekeqe (Out of Community Without Accrual) nohlukanise okuthile kungakashadwa (Out of Community With Accrual).
Uma uzazi ukuthi usafuna ukwandisa umndeni noma uhlobo lomsebenzi owenzayo obucayi noma ufuna ukuba nomndeni namakhosikazi amaningi, hlela kahle izinto zakho, zingakweqi ngaphezulu. Shada ngaphansi kwe-recognition of Customary Marriages Act, uphinde ube yi-out of Community of Property Without Accrual.
Uthi uselapho, ungakhohlwa ukubhala incwadi ecaza amafa akho ukuthi ufuna aye kubani, nini kanjani ngoba kutheni. Okwakha isisekelo sezizukulwane kulele kuwena futhi kuqala ngokuhlela kahle amafa akho. Akondliwe izingane:
Nakhu okunye okucishe kwasala, asondleni phela madoda aqotho, asikhiphe okufanele ukuze izingane zingasokoli. Asingagcini ngokukhipha imali nje kuphela kodwa asibe nesikhathi esanele futhi sekhethelo nezingane zethu.
Ukondla akukona okwendoda kuphela, nomama akathi chatha.
Uma kungavunyelwene ikhona i-maintenance Court. Uma kushayisanwa ngamakhanda mayelana nengane, ikhona i-children’s Act izokuxazulula lokho. Nehhovisi lika-family Advocate lisamile ekusizeni abantu ukuze bakwazi ukuthola izingane zabo.
Into enhle ngaleli hhovisi ukuthi kalifani nozikalala okhokhisayo, lona limahhala hha.
Kuphinde kube namadoda ahlukunyezwayo kodwa angakwazi ukukhala, amanye aze abhukude kubona utshwala, kanti cha inkinga yimpatho esekhaya. Nawe ndoda i-domestic Violence Act iyakuvikela, i-protection from Harassment Act iyakuvikela njengoba umthetho ungabheke bulili, inqobo nje uma uzowusebenzisa kahle.
Ibalulekile indima elinywa ubaba ekhaya nasemphakathini, singakha ikusasa elihle neliqhakazile uma singase nje siqiniseke ukuthi siziphatha kahle njengamadoda. Esihlekisana nabo sibaphatha kahle, izingane asiziphathe kahle, nathi siphinde siziphathe kahle.
Kule nyanga ujulayi ngithi nje madoda aqotho, qhubekani nibeke isithunzi samadoda ebalazweni, bese ngithi kulabo abasasalele ngemuva, ithuba lisekhona.
Umbuzo usamile, kungabe wena uma usungasekho kwelimagad’ahlabayo, ufuna umphakathi, umkakho, umuntu wakho, izihlobo zakho, abangani nomakhelwene bakukhumbule njengendoda enjani?