Kugqame izinkinga ZE-NSFAS kwethulwa isabelomali
UBEKWE emahlombe kangqongqoshe wezemfundo ephakeme, udkt Nobuhle Nkabane, umsebenzi wokulungisa izinkinga ezihaqe isikhwama esixhasa ngemifundaze sibuye sibolekise ngemali yokufunda ezikhungweni zemfundo ephakeme, i-national Students’ Financial Aid Scheme (NSFAS), esishintsha abalawuli.
Amalungu ephalamende amnxusile ungqongqoshe ukuthi alungise izinto esikhwameni ngoba sekuyinsakavukela ukujutshwa kwabalawuli kungakapheli isikhathi esingakanani.
Udkt Nkabane uzwakalise ukukhathazeka ngezinkinga kulesi sikhwama. Lokhu ukuveze izolo ngesikhathi ethula isabelomali somnyango sika-r137.5 billion, ephalamende.
Ungqongqoshe uveze ukuthi I-NSFAS yabelwe u-r54 billion, wokuxhasa izitshudeni ezidonsa kanzima.
“Akukuhle ukuthi I-NSFAS iphuma, ingena ngaphansi kwabalawuli abehlukene. Kumele kuliwe nenkohlakako kulungiswe izinkinga ezibhekene nalesi sikhwama.”
Uveze ukuthi selokhu sasungulwa isikhwama eminyakeni yawo-90, sesixhase abafundi ababalelwa ku-5 million.
“Yiyona nto enhle eke yenziwa nguhulumeni kuleli ukuxhasa izitshudeni ezidonsa kanzima ngemali. Ngaphansi kwalesi sikhwama kuzoxhaswa izitshudeni ezevile ku-31 000 ngokubolekwa imali yokufunda ngoba abazali bazo behola kusuka kur350 000 kuya ku-r600 000 ngonyaka,” kusho udkt Nkabane.
I-NSFAS ibhekene nezinkinga ezithinta ukungakhokhelwa ngesikhathi komastende abagcina sebejikijela emnyango izimpahla zezitshudeni.
Usihlalo wekomiti lemfundo ephakeme umnuz Tebogo Letsie, ukhale ngezinkinga ezibhekene NE-NSFAS wathi maduzane abesikhwama bazovela ngaphambi kwekomiti bezochaza ngabakwenzayo ukulungisa izinselelo.
Ukhale ngokuphuza ukuthumela izimpendulo ezitshudenini ezixhasiwe, nalezo ezingaxhasiwe.
Umnuz Mandla Shikwambana WE-EFF, uthe ngeke baseseke isabelomali wathi izitshudeni ezixhasiwe zibhekana nezinkinga minyaka yonke.
Uthe udkt Nkabane kumele alungise izinselelo kulesi sikhwama.
Umnuz Mnqobi Msezane we-mk, uthe owayengumengameli wezwe umnuz Jacob Zuma, wamemezela eyemfundo yamahhala wathi kodwa namanje ayikenzeki.
Usichithile isabelomali wathi I-NSFAS ibhekene nezinkinga eziningi okumele zilungiswe.
Kwenzeka lokhu nje, iyaqhubeka impi phakathi KWE-NSFAS nezinkampani ezine ezathola ithenda yokusabalalisa imihlomulo yezitshudeni. Enye yalezi zinkampani i-ezaga Holdings (ezaga), ibuyiselwe yinkantolo enkulu yasewestern Cape, ukuthi iqhubeke nokukhokha imihlomulo.
Le nkampani yaya enkantolo iyophikisana nesinyathelo sokuyichitha ekuqhubekeni nomsebenzi wayo.
Abesikhwama bathe bazosiphikisa isinqumo senkantolo kanti basebenzisana ne-special Investigations Unit, ukuchitha izinkontileka zalezi zinkampani.
I-ezaga ithe izimisele ukuqhubeka nokukhokha imihlomulo ngempumelelo.