Owakwamashu wenaba ngokumela imexico kowokumodela
UKUHLALA emexico City, emexico iminyaka emine kwenze waqonda kabanzi ngaleliya zwe nezimo elibhekene nazo, futhi kwenza wabona ukuthi kunezinto eziningi elifana ngazo neningizimu Afrika, izwe azalwe wakhulela kulona.
Yilokho okwenze unkk Nomthandazo Dlomo wakwamashu, ethekwini, wanquma ukungenela umncintiswano wokumodela ovuleleke konobuhle abanobuzwe obubili, i-supreme Queen World 2024, ozobe uqala ukwenziwa kulo nyaka.
Exoxa nesolezwe, unkk Dlomo
(44) oneminyaka ewu-30 emodela, uthe nguye nezintokazi eziwu-7 abangenele umncintiswano bemele amazwe ehlukene omhlaba.
“Okwenze ngangenela lo mncintiswano wulwazi engaluthola ngemexico ngenkathi ngihlala khona kusuka ngo-2019 kuya ku-2023, ngenxa yokuthi umyeni wami wayesazinze khona ngaleso sikhathi, eyinxusa leningizimu Afrika khona,” usho kanje.
Uthe wabona ukuthi imexico neningizimu Afrika kufana ngokuthi kunezinto ezicishe zifane, nokuthi abantu bakhona badlule ezimweni ezinzima zokucindezeleka eminyakeni edlule.
“Ngifuna ukuqinisa ubudlelwano bokuzwana nokusebenzisana kula mazwe womabili, sisebenzisane ngezinto ezinhle esingazenza uma sibambisene ngoba ngikholwa wukuthi asikenzi okwanele ukuqhakambisa izwe lethu nokwakha ubudlelwano namanye amazwe,” kusho yena.
Uthe okunye okumhlabe umxhwele ngalo mncintiswano osungulwe yinhlangano i-global Earth Africa, wukuthi uvumeleke ukungenelwa ngabantu besifazane abaneminyaka engu-20 kuya ku-55.
“Lokho kuhle kakhulu ngoba kuvumela abantu abaningi besifazane, abancane nasebekhulile njengami ukuthola ithuba lokugqama, bakhulume ngokukhululeka ngezinto abakholelwa kuzona, into engandile ngoba imincintiswano eminingi ifuna intsha engakadluli ku-50,” usho kanje.
Ephetha, unxuse abantu ukuthi bamvotele ngokungena ekhasini le-instagram elithi: @ sq_globalearthafrica bese bebheka lapho okunesithombe sakhe khona, balandele imiyalelo yokumvotela.
Umcimbi wokuklomelisa unobuhle onqobile uzoba se-indaba
Hotel, efourways, egoli ngo-agasti 3.