Amazulu asethembe umusa wesundowns ngomdlali
AMAZULU afongqe isigqoko kwimamelodi Sundowns, acela ukuthi iqhubeke nokuwaboleka umdlali usifiso Ngobeni, oyibamba emuva ohlangothini lakwesokunxele.
Ngojanuwari ungobeni (27) owazakhela igama esadlalela ibloemfontein Celtic, usayine inkontileka yokubolekiswa osuthwini izinyanga eziyisithupha. Ushiye isundowns ngesizini edlule esadlale emidlalweni emibili lapho banqobe khona istellenbosch, nesupersport United. Isizini edlule iphele Amazulu ewadlalele kowecape Town City, nakowesekhukhune United kuphela. Osuthwini emuva kwesokunxele, ijezi ubelibanga noriaan Hanamub odlalela iqembu lesizwe lasenamibia.
Echlorkoop, ungobeni ubelibanga no-aubrey Modiba odlalela ibafana Bafana, Divine Lunga wasezimbabwe noterrence Mashego osayine kwisundowns esuka kwicape Town
City. Kuvela ukuthi lo mdlali akazange aqale amalungiselelo esizini ka-2024/25 nesundowns. Kunalokho, uziqeqesha nosuthu kusukela ngesonto eledlule.
Kuvela nokuthi ungobeni ukhona kubadlali bosuthu abaqale ikhempu izolo, ebenoni, egauteng.
Nakuba kungacaci ngemininingwane ephelele, leli phephandaba lithole ukuthi ubuholi bamazulu buncenga isundowns ukuthi ivuselele inkontileka yokubolekiswa kukangobeni.
Kuthiwa Usuthu belufuna ukumthenga ngokuphelele lo mdlali isundowns emthathe kwiceltic.
"Selokhu usuthu luvulile emsebenzini ungobeni ubekhona kusukela ngosuku lokuqala. Kuthiwa kuphinde kwavuselelwa inkontileka yokubolekiswa kwakhe. Vele kwisundowns ubebukeka ezoqhubeka nokungalitholi ijezi. Asethembe ukuthi kule sizini ucijimpi ( uplablo Martin) uzomdlalisa," kubeka umthombo.
Uphilani Ndlela, okhulumela Amazulu, uthe ayikho into esisayiniwe mayelana nongobeni. Uveze ukuthi Amazulu afuna ukumthenga ngokuphelele. Izingxoxo zisaqhubeka.
"Ngicela ungithinte ngasekupheleni kwesonto elizayo. Okwamanje zisaqhubeka izingxoxo zokuthi Amazulu amthenge ngokuphelele ungobeni.
Silinde isundowns. Njengoba kunethimba elisha labaqeqeshi bayo, mhlawumbe bazomdinga. Silele emseni wayo," kubeka umthombo.
Leli phephandaba lithole nokuthi nohanamub, obanga nongobeni ijezi, usekhempini nosuthu njengoba luzicijela ukuqala kwesizini ka-2024/2025. kuphele isizini edlule elokhu evela amahlebezi okuthi uhanamub ufunwa yi-orlando Pirates.
Ngesizini ka-2022/2023 kwavela ukuthi lo mdlali usesayinile kwezimnyama kodwa Amazulu akuchitha lokho.