Amajunior Boks azobuya nabasha kuwafawafa ne-england
KWENZIWE izinguquko eziyisikhombisa eqenjini lesizwe lombhoxo labesilisa lika-under-20 elizodlala umdlalo wamaqoqo obucayi weworld Rugby Under-20 Championship ne-england kusihlwa.
Amajunior Boks ne-england bazodudulana emdlalweni kapool C okufanele awunqobe ozoqala ngo-7 e-athlone Stadium ekapa.
Iqembu lakuleli liwuqale kahle lo mqhudelwano ngokuqumba phansi ifiji ngo 57-7. Nokho alikwazanga ukuwubamba lowo mgqigqo emdlalweni wesibili lapho linqotshwe khona yi-argentina ngo 31-12.
Lokhu kuchaza ukuthi leli qembu, eliphekwa ngubafana Nhleko, lisendaweni yesibili eqoqweni lalo ngamaphuzu amahlanu. Alingana nawe-argentina esendaweni yesithathu.
I-england isaqhwakele kupool C ngamaphuzu angu-10 kulandela ukunqoba i-argentina ngo 40-21, nefiji ngo 48-11.
Unhleko wenze izinguquko ezintathu kwabazoqala emuva. Ulukhona Finca ungene endaweni kajoel Leotlela ephikweni lwangakwesokudla, umichail
Damon angene esikhaleni sikabruce Sherwood kwi-fullback bese ujosh Boulle engena endaweni kaphillipalbert van Niekerk kwi-inside centre.
Phambili kukhishwe uruan Swart kwafakwa ucasper Badenhorst kwi-loosehead prop, uthomas
Dyer uzoqala kwi-lock, usibabalwe Mahashe angene kwi-flank bese uthabang Mphafi ethatha ijezi eliwunombolo-8 kwi-looseforward.
“Okusemqoka kithina wukuthi sigxile ezinhlelweni zethu, silungise amaphutha esiwenze sibhekene ne-argentina. Kufanele senze isiqiniseko sokuthi sibuyisa umfutho wethu futhi siqine ngokomqondo kulo mdlalo omqoka kangaka,” kusho unhleko.
“Siwulungele ngokuphelele lo mdlalo njengoba sazi kamhlophe ukuthi ubaluleke kangakanani. Sikulungele ukubhekana neqembu le-england eliyingozi futhi elizethembayo ngenxa yokunqoba imidlalo emibili.”
“Abadlali bayaziqhenya ngokumela iningizimu Afrika futhi bahlose ukwenyusa izinga kulo mdlalo.”
Amaqembu azoqhwakela emaqoqweni womathathu azodlulela kweyandulela owamanqamu, ehambisana neqembu elizoqeda endaweni yesibili ngamaphuzu angcono kunamanye.
Iqembu lamajunior Boks elizobhekana ne-england kusihlwa:
Abazoqala: 15 Michail Damon, 14 Likhona Finca, 13 Jurenzo Julius, 12 Joshua Boulle, 11 Litelihle Bester, 10 Liam Koen, 9 Asad Moos, 8 Thabang Mphafi, 7 Bathobele Hlekani, 6 Sibabalwe Mahashe, 5 JF van Heerden, 4 Thomas Dyer, 3 Zachary Porthen (ukaputeni), 2 Luca Bakkes, 1 Casper Badenhorst.
Abasebhentshini: 16 Ethan Bester, 17 Liyema Ntshanga, 18 Herman Lubbe, 19 Jaco Grobbelaar, 20 Tiaan Jacobs, 21 Divan Fuller, 22 Tylor Sefoor, 23 Phillip-albert van Niekerk.