Owebay ujabulela uzinzo unozinti esayina inkontileka
KUQHILIKA izihlathi kusihlalo werichards Bay FC, usifiso “Jomo” Biyela ngesinqumo sikanozinti, usalim Magoola, oqoke ukuvuselela inkontileka naleli qembu.
Inkontileka kamagoola, wase-uganda (29), ibizophela njengoba kuphela ujuni. Nokho ubiyela ukuqinisekisile ukuthi lo nozinti uyivuselele ngeminyaka emithathu phezu kokufunwa ngamanye amaqembu obekubalwa kuwona ikaizer Chiefs.
Ngesonto eledlule, umagoola usize ibay yagcina indawo yayo kwidstv Premiership iwina imidlalo YEPSL Promotional Playoff. Ngesizini edlule, umagoola uvimbe emidlalweni engu-31 uma sekuhlangene yonke imiqhudelwano. Akangenelwanga yigoli emidlalweni engu-10.
Bekunezinkulumo zokuthi ichiefs ifuna ukuvala ngaye isikhala sika-itumeleng Khune iqembu lakhe elamemezela ukuthi usesayine inkontileka yokugcina ekuqaleni kwesizini ka-2023/2024.
Ubiyela uthe ukusayina inkontileka entsha nebay kukamagoola kuzolisiza kakhulu iqembu.
“Abekhona amanye amaqembu abemfuna kodwa waqoka ukuvuselela inkontileka nathi. Ngijabule ngalokhu, kuyinto enhle ngoba kukhombisa ukuthi siyiqembu kukhona okuhle esikwenzayo yikho ezibophezele ukuhlala lapha eminye iminyaka emithathu,” kusho ubiyela.
“Kubalulekile ukuthi sibenawo umgogodla weqembu, sengeze ngabanye esibadingayo. Kubalulekile ukwakha uzinzo nenqubekela phambili eqenjini ikakhulukazi ezintini ngoba unozinti omusha kuzomthatha isikhathi ukujwayelana nabadlali basemuva. Ngakho ukuvuselela kukamagoola inkontileka kusinika uzinzo kakhulu.”
Nakuba ecishe wavimba yedwa isizini yonke umagoola kodwa akawudlalanga umqhudelwano icarling Knockout. Lo nozinti ushiye izikhulu nabaqeqeshi bebay bedidekile ebatshela ukuthi ngokwenkolo yakhe akavumelekile ukuzimatanisa notshwala. Lokhu kwenzeka ngaphambi komdlalo we-last 16 nemoroka Swallows. Ibay yafinyelela kowandulela owamanqamu eyawudlala nestellenbosch FC emuva kokukhipha i-orlando Pirates kumaquarterfinal kuvimbe unozinti osemncane, uphilasande Manqele, owayesuka eqenjini ledstv Diski Challenge. Unozinti onesipiliyoni, umalcolm Jacobs, akavimbanga isizini yonke.
“Kulokhu sizoyikhuluma kusenesikhathi (indaba yokungavimbi kwicarling). Akukho okonakele. Ngesizini edlule samangala ngoba washo ekugcineni. Kungcono sikhulume ngayo kumanje,” kusho ubiyela.
Ibay ivuselela inkontileka kamagoola nje, isanda kuqinisekisa ukuthi izoqhubeka nomqeqeshi, uvusumuzi “Kanu” Vilakazi, oyisindise ezembeni. Ngaphezu kwalokho, imatasa izama ukusayinisa abadlali abasha ezoqinisa ngabo iqembu ngaphambi kokuqala kwesizini ka-2024/2025.