Ziqinile izinhlelo zokuqinisekisa eyabahola isibonelelo sabangasebenzi
ISOUTH African Social Security Agency (Sassa) isiqinise izinhlelo zayo zokuhlola abahola izibonelelo zikahulumeni njengoba ilwa nenkohlakalo.
Isolezwe lithole izikhalo kwabahola isibonelelo sika-r350 sabangasebenzi, akade bekhala ngokuthi sekuthatha isikhathi eside ukuqinisekisa imininingwane yabo.
Libe selibhalela i-sassa nokuyilapho iveze ukuthi isinohlelo olunzulu lokuqinisekisa ukuthi imali iholwa ngabantu abafanele ukuze kungabikhona oyikhwabanisayo.
Esitatimendeni esithunyelwe kwisolezwe ngumnuz
Paseka Letsatsi, obhekelele ezokuxhumana kwa-sassa kuzwelonke, uthe kunohlelo lokuqinisekisa imininingwane yabantu ngokubheka amanyela abo eminwe nokuqinisekisa ukuthi ubuso obusesithombeni sikamazisi yilobo bomuntu ohola isibonelelo.
Uthe lolu hlelo lubheka kakhulu labo abathola isibonelelo se-covid-19
SRD esijwayeleke ngokuthi isibonelelo sabangasebenzi.
“Amakhasimende asuke elulungisa imininingwane yawo yasebhange nezinombolo zocingo athi uma eqeda bese siqala uhlelo lokuqinisekisa ukuthi imininingwane ngeyakhe ngempela yini lowo muntu.
Uma kusolwa ukuthi kunobugebengu obuqhubekayo, abahlomulayo bazohlolwa ukuthi yibo ngempela yini. Lokhu kwenzelwa ukulwa nokukhwabanisa. I-sassa isebenzisana nezinhlaka ezehlukene ukuqinisekisa ukuthi imali iya kubantu abafanele,” kusho uletsatsi.
Uthe bazoqinisekisa ukuthi nabafaka izicelo zezibonelelo ezintsha imininingwane yabo iyacutshungulwa.
Ukuqinisekisa imininingwane, abahola izibonelelo zikahulumeni kufanele babe nomakhalekhukhwini onobuchwepheshe besimanje noma ikhompyutha enekhamera, babe ne-data esebenza kahle noma i-wifi, bahlale endaweni ekhanya kahle lapho bezokwazi ukuthi kube yibona bodwa abazovela esithombeni.
Uthe isibonelelo sabangasebenzi, i-covid-19
SRD, sifakwa kwikhompyutha noma sekwenziwa izinguquko zenziwa kwikhompyutha.
I-sassa ibe isinikeza umuntu ozoqinisekisa imininingwane yakhe konke okufanele akwenze.
Abantu abangayiqinisekisi imininingwane yabo noma abangaluqedi uhlelo lokuqinisekisa imininingwane bagcina bengasaholi. Luyama uhlelo lokuholela umuntu isibonelelo sakhe kuze kube uqeda uhlelo lokuqinisekisa imininingwane.
Uletsatsi uthe bazibophezele ekuqinisekiseni ukuthi abahola izibonelelo baphephile futhi uhlelo lokuqinisekisa imininingwane ngeke luphazamise abahola ezinye izibonelelo zikahulumeni.
Ngeminye imininingwane abahola izibonelelo bangashayela u-0800 60 10 11.