Akusona isono ukusebenza ngokubambisana kwezepolitiki
MHLELI: Ngike ngabhala ngikhuthaza isizwe sakithi ukuba siphume ngothi lwaso ukuyovota, ngaphinda ngathi: “Zulu omuhle kakhulu selidume ledlula.”
Uma ngithi Zulu ngisho wonke muntu womdabu, hhayi uhlanga oluthize. Uma ulalela ukuphawula kwesizwe emisakazweni, emaphepheni nasezinkundleni zokuxhumana kuvunguza umoya wentukuthelo evutha ulaka olumangalisayo. Uzwa kukhona abathi nxa ukhongolose usebenzisana ne-democratic Alliance (DA) lokho kusho ukudayiseka kwabomdabu.
Abanye bethi nxa I-IFP isebenzisana nokhongolose (ANC) lokho kakulungile, ngokunjalo nxa I-IFP isebenzisana ne-da kakulungile. Bathi uma I-IFP isebenzisana ne-da kakulungile. Ngeshwa, umkhonto wesizwe (MK) kawutholanga ukuxoxa namanye amaqembu ngakho singebholofida ukuthi ubuzothini. Ngibhala ukukhuza ulaka olungenasidingo.
Kakufanele silawulwe yintukuthelo ngoba izwe lethu lingaba umlotha kungadingekile. Kakumele senze noma sikhulume sengathi kunempi yezepolitiki. Izwe lethu linozinzo nokuthula futhi lilawulwa ngomthethosisekelo. Umthethosisekelo uyakugunyaza ukuzihlanganisa noma ngubani (Freedom of Association) uyakugunyaza ukuzikhethela (Freedom of Choice).
Amaqembu ethu aholwa ngabaholi esizikhethele thina. Umholi ukhethwa ngokuthenjwa ukuthi uyakwazi ukuthatha izinqumo eziphusile.
Ngakho-ke nxa sekuvotiwe kwatholakala ukuthi kakho ophumelele ngokukwazi ukubusa eyedwa, yilapho phela kudingeka izingxoxo zokubonisana ngesikhathi esibekiwe.
Abaholi baphoqekile ukusebenza ngezinombolo eziphezu kwetafula, hhayi ngokuthi bathanda bani kumbe kabafuni bani.
Kuyenzeka ukuthi lowo abamuzwa esifubeni sabo angakwazi ukubasiza baphumelele. Bazithola bephoqekile ukuthi bahlangane nanoma ubani ukuze kuzuze abantu ababakhethile.
Kubalulekile futhi ukuthi enikwenzayo kungethusi abatshalimali okuyibo abadala amathuba omsebenzi. Uma kuthatha isikhathi eside kungekho hulumeni ziyabhoncuka izikhonkwane zomnotho ngoba lokho kusho ukuthi kaninabaholi abahlakaniphile.
Lapha eningizimu Afrika kalikho iqembu elisempini nelinye uma emaphuzwini alishumi ekwazi ukuvumelana ngayisikhombisa ehlukana ngamathathu. Lokhu kusho khona ukuthi ningasebenzisana nigawule imithi emikhulu emincane iziwele.
Ngakho-ke kalikho iphutha ekuvumelaneni kwamaqembu. Makungabukwa ibala, izinkolelo nokunye okungasho lutho.