Ibanyana igixabezwe ngesamba sika-r2 million
ONGUMDLALI wasesiswini kwibanyana Banyana, unomvula “Lipstick Lady” Kgoale, uchome i-tymebank uphaphe lwegwalagwala ngokuyiletha ngqo kubona njengeqembu imali ebanikelele ngayo, esikhundleni sokubandakanya isouth African Football Association (Safa).
Abebhange lasetymebank bagixabeze iqembu ngesheke lika-r2 million, beliklomelisa ngokuhamba kwalo ibanga kwififa Women’s World Cup ka-2023 ebiseaustralia nasenew Zealand nyakenye.
Leli qembu eliqeqeshwa wudesiree Ellis, laqopha umlando kulo mqhudelwano ngokuba yiqembu lokuqala lesizwe lebhola lasemzansi ukufinyelela emzuliswaneni womkhumulajezi welast 16 emqhudelwaneni wendebe yomhlaba.
“Sijabule kakhulu ukubona imali iza kithina ngqo. Itymebank yenze kahle kakhulu ngokungafaki abanye, ngoba besizozwa okunye, noma sigcine singazanga ukuthi imali iphelelephi,” kusho ukgoale ngenkathi iqembu lamukeliswa isheke kuleli sonto (ngolwesithathu).
“Ngakho uma imali isuka ebhange iya kubanikazi bayo, okuyibanyana, siyajabula ngoba ngeke kube khona zinkinga.”
Oyisikhulu esiphezulu etymebank, ucheslyn Jacobs, ukuqinisekisile ukuthi isamba esingu-r2million sesivele sehlukanisiwe sabiwa ngononina kubadlali, ithimba labaqeqeshi, nazo zonke izikhulu eziyingxenye yebanyana.
Uthe isizathu esenze ukuthi bangayifaki isafa kulo mnikelo wabo, yingoba abanabo ubudlelwano bokusebenzisana nale nhlangano eyengamele ibhola kuleli.
“Imali siyikhokhe ngqo eqenjini. Abadlali nawo wonke amalunga eqembu ayeyingxenye yeworld Cup azohlomula kulo R2million, ngisho nomshayeli nophatha ijezi leqembu (kit manager). Sivumelane ngokuthi le mali sizoyicaza ngokulinganayo, kungabi bikho ongahlomuli,” kuchaza ujacobs.
Leli sheke lemukelwe ngumqeqeshi webanyana, udesiree Ellis nabadlali bakhe okubalwa kubona ukasylin Swart, Bambanani Mbane, Karabo Dlamini, Melinda Kgadiete, Kholosa Biyana, nokgoale.
Itymebank ingaphansi kwe-african Rainbow Capital ephethwe wupatrice Motsepe ongumengameli wecaf nongusomabhizinisi wakuleli.