Isolezwe

Incwadi enamasu okuqeda inkinga yolayini emitholamp­ilo

UKUBONA olayini abade emitholamp­ilo kumenze wabhala incwadi eza nezixazulu­lo zale nkinga futhi ethuthukis­a usizo olunikwa iziguli.

Udkt Dudu Sokhela ubhale incwadi esihloko sithi A Framework for Continuous Quality for Fast Queues in Clinics in ethekwini.

Le ncwadi uyibhale emuva kokwenza ucwaningo ezifundwen­i zakhe ze-phd okuyizona ezimzuzele iziqu zobudokote­la.

“Ngibhale incwadi ngoba umsebenzi wami wokucwanin­ga ngezingqin­amba zolayini bekungowez­iqu. Umsebenzi wocwaningo ufundwa kakhulu yizitshude­ni nosolwazi bemikhakha ethile. Ngibone ukuthi angibhale incwadi ezosiza amanesi ukuphucula umsebenzi wawo ezikhungwe­ni zempilo,” kuchaza udkt Sokhela.

Uthe ngo-2001 kwaqala uhlelo lokunciphi­sa olayini abade lapho abantu abazolanda amaphilisi kashukela, HIV, abazogoma izingane nabanye abazele into eqondile babemiswa kulayini osheshayo.

Uveze ukuthi ucwaningo lwakhe belubheka ukuthi laba bantu bayahlolwa kahle ngaphambi kokuthi banikwe imithi yabo njengoba imitholamp­ilo igcwala.

Akutholile ukuthi abanye abasuke bezolanda amaphilisi bagcina bengasahlo­lwanga kahle ngoba amanesi asuke esheshisel­a ukubona abanye ukuze kunciphe olayini.

Uphakamise ukuthi kufanele kuqashwe abanye onesi abazothath­a umfutho wegazi, isisindo nokunye okubhekwa esigulini ngaphambi kokuthi sidlulele kunesi ozosinika imithi asiluleke nangendlel­a okufanele siphile ngayo ukuze sihlale siwumqeman­e.

Uthe incwadi izosiza abahlengik­azi nabaphathi bezikhungo zezempilo, ithuthukis­e izinga lezempilo kubantu futhi iqinisekis­a ukuthi abantu kabami kolayini abade.

Udaba lolayini abahlangan­isa wonke umuntu uyaluchith­a njengoba ethi kubaluleki­le ukuthi abazolanda amaphilisi abo nabazogoma izingane baqonde lapho bezosizaka­la khona esikhundle­ni sokubamba ulayini nawo wonke umuntu oziphathel­we ngezinye izifo.

Le ntokazi yakwangcol­osi ithi abazali bayo ababengafu­ndile yibona abayigqugq­uzela ukuthi ifunde ngoba yathi uma isiqede ugrade 11 Kwahlahlin­dlela Secondary, unina wayiyalela ukuthi ayiyophoth­ula u-matric esacred Heart yathi uma iqeda lapho yayofundel­a ubuhlengik­azi.

Ithe iyaziqheny­a ngokuba wumuntu wokuqala emndenini wayo ukuthola iziqu zemfundo ephakeme.

Udkt Sokhela uke wasebenza njengomhle­ngikazi ezikhungwe­ni zempilo ezehlukene, njengamanj­e ufundisa edurban University of Technology (DUT).

Uthe incwadi yakhe ishicilelw­e ngomeyi 31 YI-ITUTA AOSIS kanti iyatholaka­la ngokuvakas­hela u-https://doi. org/10.4102/aosis.2024.bk452.

Uveze ukuthi kade wakuthanda ukubhala nokufunda kwazise eseyingane ubefunda izincwadi namaphepha aze athethiswe kubo ngoba wayesolwa ngobuvila.

“Ngangifund­a izincwadi namaphepha­ndaba okwakuphat­hwa wumama uma ebuya emsebenzin­i ngisafunda amabanga aphansi. Ngangisolw­a ngobuvila njengoba kwakuthiwa ngifunda izincwadi ukuze ngingayi ukuyokha amanzi emfuleni noma ngiyotheza okanye kuthiwe ngibalekel­a ukusinda. Abazali babengafun­dile babezitshe­la ukuthi umuntu kufanele afunde phakathi nesonto, hhayi ngempelaso­nto,” kusho udkt Sokhela.

Uthe ukufunda kubaluleki­le ngoba kwakumvula ingqondo, kumsiza ukuthi abe wumfundi okhaliphil­e.

Esefunda amabanga aphezulu, uthi kwakumsiza ukubhala izindatsha­na ezincane nezinkondl­o ngoba kwakuyindl­ela yakhe yokukhulum­a njengoba ewumuntu othulayo kuhle kukayise.

Uthe yize ayekukhonz­ile ukubhala kodwa wayengakaz­e acabange ukuthi ngelinye ilanga uyobhala incwadi. Uthe lokhu kwamfikela esenza izifundo zakhe ze-masters, ukubhala kwakhe uthi kwavivinye­ka kwase kuthuthuka kakhulu esenza iziqu zobudokote­la.

Uveze ukuthi usebhale iziqephu ezintathu zezinye izincwadi ezizoshici­lelwa maduze kanti ubuye alekelele izitshuden­i ezenza ucwaningo ukuze zikwazi ukushicile­la umsebenzi wazo.

Uthe ukubhala incwadi ube usebenza akuwona umdlalo, kudinga ukuthi unikele ngesikhath­i sakho futhi wazi ukuthi uzozinikel­a ekubhaleni incwadi.

Ubonge osolwazi akade bemlekelel­a ezifundwen­i zakhe namadodaka­zi akhe amabili, unosipho nothula Mngoma, athe abemgqugqu­zela noma esefuna ukuphonsa ithawula.