Kuzoqhakanjiswa nemfashini emcimbini Ingoma Kazwelonke
KULINDELEKE ukuthi kube nezinguquko ezizoqhubeka nokukhombisa ubuhle bomcimbi wengoma Ingoma Kazwelonke, ozobanjelwa epeoples Park, ethekwini ngojuni 22.
Kulo mcimbi osubanjwe iminyaka emibili, kusuke kuqhudelana amaqembu endlamu aqhamuka ezweni lonkana.
Kulo nyaka, omunye wabahleli bomcimbi, uxolani Mcineka uveze ukuthi emaqenjini angu-62 azobe eqhudelana, angaphezu kuka-50 azobe eqala ukuba yingxenye yomcimbi.
“Uma kungathiwa sithi kulo mcimbi sivumela amaqembu engoma wonke akhona, ngeke uze uphele ngosuku olulodwa. Kodwa ithimba elihlelayo lakhetha ukuthi iminyaka emibili uma lo mcimbi usaqhubeka sizoba namaqembu awodwa, bese kuthi ngonyaka wesithathu ashintshe kungene amanye. Kulo nyaka iningi lamaqembu masha futhi sijabule ngendlela isasasa eliqhamuka emagoseni ngokuba yingxenye yawo. Amanye abuyayo ngenjongo yokuthi abe negalelo ekuqhakambiseni lo mcimbi ngezinto ezehlukene amagosa akhona akade ezenza beyingxenye yawo. Injongo yethu njengabahleli wukuthi siqhakambise wonke amaqembu emkhakheni wengoma,” kusho umcineka.
Uthe ifolo lomaskanda, okungabaculi bakamaskandi abehlukene, nalo lizobe likhona kulo mcimbi ukujabulisa izinkumbi zababukeli abazobe bekhona.
“Siyanxusa ukuthi abantu bagcine isikhathi ukuze umcimbi uqale ngesikhathi futhi uphele ngaso. Kulo nyaka okunye esihlele ukuthi sikwenze ukubheka abazobe bewuhambele ukuthi bahlobe kanjani, njengoba sazi ukuthi imfashini ngenye yezinto ezidonsa amehlo kule micimbi. Ngakho izihambeli zethu mazigqoke ziconse ngemfashini yazo ezobe ibhekiwe,” kuchaza yena.
Uthe amathikithi EVIP NEVVIP aseyatholakala.
Ugcizelele ukuthi abawadingayo basheshe babathinte njengoba kwaziwa ukuthi ayinyama.