I-sundowns iphunyukwa yizindebe ngenxa yezinqumo zonompempe
MHLELI: Esikhathini esedlule bekuyikaizer Chiefs ebinomkhuba wokudla imamelodi Sundowns ngendlela engaqondakali, esishiya sonke sinemibuzo engenazo izimpendulo ngenxa yezinqumo zonompempe ezingagculisi neze emidlalweni yamanqamu.
Siyakukhumbula sonke okwenzeka ngo-1998 kowamanqamu wendebe yerothmans esibizwa ngecarling Knockout Cup namuhla. Kulowo mdlalo kwaphikwa elihle igoli likajoel Masilela wesundowns kwathiwa ube yi-offside kube kucaca bha ukuthi akusiyo.
I-chiefs yagcina iwunqobile lowo mdlalo yadla isicoco. Kuyadumaza kakhulu ukubona ukuthi nepirates seyinawo lowo mkhuba wokudla isundowns ngendlela eyenza sishaye amakhala emidlalweni yamanqamu.
Ngo-okthoba ngonyaka odlule ipirates yanqoba
IMTN8 ngenxa yezinqumo eziningi ezingezinhle ezathathwa ngunompempe emdlalweni. Kwaphikwa amaphenathi amathathu ayevuna isundowns. Nakhu nangempelasonto kwenzeke esifanayo lapho ipirates inqobe isicoco senedbank Cup ngendlela engagculisi neze ngezinqumo zikanompempe. Iphenathi etholwe yipirates eshaye ngayo igoli lokulinganisa, akekho ongabonanga ukuthi bekungesiyo nakancane. Umgadli wepirates nguye odlalise kabi umgadli wesundowns, kuphinde kwenzeka okusishaqisa sonke lapho unozinti wepirates usipho Chaine ethole amakhadi amabili aphuzi kodwa wangalithola elibomvu. Kuphinde kwadlaliswa kabi uthemba Zwane umdlali wesundowns ehlasela kwathiwa nguye odlale kabi ibhola makube elepirates.
Negoli lesibili lepirates elishaywe ngurelebohile Mofokeng liqhamuke kwifree-kick esishaya amakhala ngayo ngoba umdlali wepirates nguye ogxumele kumdlali wesundowns kodwa ibhola lanikezwa ipirates. Kuningi okungagculisi okwenziwe ngunompempe obelawula umdlalo.
Okubuhlungu wukuthi abalandeli bala manqembu asesoweto, ichiefs nepirates, bazishaya isifuba ngokuthi bayayehlula isundowns ngomlando wezindebe bebe bazi kahle kamhlophe ukuthi bayehlula ngendlela engenabo ubulungiswa.
Nango-2012 ngesikhathi isundowns idlala nebleomfontein Celtic umdlalo wamanqamu wetelkom Knockout yadliwa ngendlela engaqondakali lapho umdlali weceltic ujoel Mogorosi ashaya ibhola elashaya ipali langangena emapalini kodwa kwathiwa yigoli.
Umbuzo uthi kuyoze kube nini isundowns iphunyukwa yizindebe ngenxa yezinqumo ezingezinhle ezithathwa ngonompempe?