I-ANC ibisazihola phambili kuzwelonke
YIZE kuseva ukuqinisekisa ukuthi yiliphi iqembu elidle umhlanganiso kuzwelonke ngoba kuqhubeka uhlelo lokucwaninga imiphumela yokhetho kodwa siye koshicilela izolo ebusuku, I-ANC isazihola phambili ngezibalo kuzwelonke.
Inhlangano ibisathole amavoti angaphezulu kwesigidi, ilandelwa yida ngabalelwa ku-600 000, kanti I-EFF ibisathole angaphezu kuka-200 000.
Iqembu eliholwa ngowayengumengameli WE-ANC nezwe umnuz Jacob Zuma, Umkhonto wesizwe, belilele endaweni yesine ngamavoti angu-196 000.
I-patriotic Alliance ibilele endaweni yesihlanu ngamavoti abalelwa ku-98 000, ilandelwe YI-IFP ngamavoti acela ku-50 000.
Bekusabalwe amavoti evile ku-2.5 million, kanti acekeleke phansi abesabalelwa ku-33 000.
I-ANC ibisami ku-43.41% ngokwesekwa kanti kuzomele inhlangano ithole ngaphezu kuka-50%, ukuze ibuyele emandleni.
Uma ithola ngaphansi kwalokhu kuzodingeka ukuthi isebenzisane namanye amaqembu ukuze ikwazi ukugcina amandla.
I-ANC ibisahamba phambili ezifundazweni eziyisikhombisa okuyimpumalanga, North
West, Northern Cape, Limpopo, Free State,
Eastern Cape nasegauteng. Ewestern Cape I-DA ibizihola phambili kulandele I-ANC, kanti Kwazulunatal I-MK iyona ehamba phambili kulandele I-IFP. I-ANC ibihleli ezithendeni endaweni yesithathu EKZN.
I-IFP ibifuna ukubuyisa isifundazwe ngoba yayisiphethe ngaphambi kuka-2004.
Leli qembu belilokhu lizidlela amahlanga uma kunokhetho lokuchibiyela EKZN.
Usihlalo WE-ANC umnuz Gwede Mantashe, ekhuluma nabezindaba ekomkhulu lemiphumela emidrand egauteng izolo, uthe umangele ngokwenza kahle kwe-mk EKZN.
Uthe kodwa kwezinye izifundazwe akathembi ukuthi izokwenza kahle.
“Sifuna ukuwina ngamalengiso kulolu khetho. Sisabheke yona asikayikhulumi eyokuthi sizobambisana naliphi iqembu okwamanje. Sizobona emuva kwemiphumela,” kusho umantashe.
Umengameli WE-ANC umnuz Cyril Ramaphosa, ubezishaya isifuba njalo uma ekhankasa eveza ukuthi banethemba lokuthi bazobuyela ekuphatheni izwe kanjalo nesifundazwe IKZN emuva kokhetho.