Ichiefs ibheke isinqumo sikakhune
I-KAIZER Chiefs isilinde isinqumo sikanozinti, u-itumeleng Khune, okulindeleke ukuthi acacise ngekusasa lakhe kuleli qembu.
Emasontweni adlule, ukhune uhlonishwe yichiefs yambonga ngomsebenzi wakhe eminyakeni engu-25 eyibambile enaturena. Lokhu kwenzeke ngaphambi komdlalo wayo weligi nepolokwane City EFNB Stadium. Ekuqaleni kwesizini, ichiefs imemezele ukuthi inika ukhune inkontileka yokugcina engumdlali wayo.
Nokho lo nozinti uthe usazimisele ngokudlala amanye amasizini kwidstv Premiership. Ekuqaleni kwesonto, kuvele ukuthi isupersport iyayicabanga ekakhune kwazise ifuna unozinti ozovala isikhala sikaricardo
Goss ophindela eqenjini lakhe imamelodi Sundowns. Ngokuthola kwaleli phephandaba, ichiefs ayizimisele ngokumlahla ukhune kodwa ayisenayo indawo yakhe.
“Abaphathi balinde u-itu ukuthi aphumele obala ngafuna ukukwenza. Siyazi ukuthi uthe usafuna ukudlala kodwa lokho ngeke kusenzeka kwichiefs. Uma esafuna ukubuyela ensimini kuzofanele ayodlala kwelinye iqembu. Kodwa ke yiliphi iqembu elisengathatha u-itu?” kusho umthombo.
“Kufanele ahlangane nabaphathi kuleli sonto ezocacisa ukuthi ufuna ukwenzani. Uma eqoka ukuhlala, angingabazi ukuthi kukhona umsebenzi azonikezwa wona ngaphakathi. Uma kukhulunywa ngomuntu onamathuba kwichiefs, ngu-itu. Kodwa ke uyena ozosho ukuthi ufuna ukwenzani.”
Okhumela ichiefs, uvina Maphosa, uthe ngeke baphendule umthombo wabezindaba ngamunye mayelana nodaba lukakhune.
“Sizobiza isithangami nabezindaba sizonekela izwe ngokuzokwenzeka ngokhune. Ichiefs ngeke iphendule umuntu ngamunye ngalokhu. Kodwa kuzokwenziwa phambi kwemithombo yabezindaba uma sekufike isikhathi,” kusho umaphosa.
Ukhune ekhasini lakhe lezokuxhumana i-instagram ulokhu ezifake njalo izithombe zezinsuku azihlale kwichiefs. Akukuningi akushoyo okucacisa ngekusasa lakhe kuleli qembu. Kwesakamuva asifake ngolwesibili, ubemi nomqeqeshi wonozinti kwikaizer Chiefs isikhathi eside, urainer Dinkelacker, emnikeza ijezi lakhe (ukhune) elisayiniwe, besihambisana nombhalo othi, “ngiyabonga Mr D.” Kwezinye ake azifaka kuleli sonto besiveza esawumfana omncane kumakhosi, kuze kufika kulezi abebongwa kuzona, wabhala wathi, “@ kcofficial impilo yami.”
Ukhune ubalwa nabadlali bechiefs abaphelelwa yizinkontileka ngenyanga ezayo. Kulaba badlali kukhona unjabulo Ngcobo, Keagan Dolly, Edmilson Dove, Siyethemba Sithebe, Lehlohonolo Matlou nosifiso Hlanti onombandela wokuyelula.
Amakhosi ahlalelwe wumsebenzi wokuthungatha unozinti ozovala isikhala sikakhune. Kunamahlebezi athi acathamela unozinti wechippa United, ustanley Nwabali ovimbela iqembu lesizwe lasenigeria.
Onozinti abebebanga ijezi nokhune ubruce Bvuma okuphele isizini kunguyena ovimbayo nobrandon Petersen oqale enikwa ijezi kodwa lagcina limlahlekele ngenxa yamaphutha.