Sekusezandleni zabavotelwe ukutakula abahlwempu osizini
YIZE isasasa lokuvota beliphezulu okhethweni olwenzeke izolo, kunesithombe esingafihleki ngesimo iningizimu Afrika ebhekene naso ngemuva komshikashika wokukhankasela amavoti kwamaqembu.
Izithombe zamazombezombe ezinjenga zabantu beyovota zibuyise ithemba ngokuthi inqubo yentando yabantu isaphila. Kodwa nxashana usondela kulaba ezindaweni eziningi zabamnyama inhlupheko isobala. Ukungabi namisebenzi kwentsha kuleli kungaholela esimweni esiyimbedumehlwana uma ubuholi bungaqhamuki nezithombululo ezinobuhlakani zokwehlisa ububha.
Kasazi noma abebekhankasa bebekubona yini lokhu noma bebegcina ngokujabulela ukugcwala kwezinkundla lapho bebenxenxa khona amavoti, abantu baswele. Baswele okokuya ethunjini.
Badinga okokondla izingane zabo. Iningi liphila ngokukhangezwa ngazo izibonelelo zikahulumeni ezingafiki kuphi kulesi sikhathi sokudla okumba eqolo. Isihlava sezidakamizwa sisefa abasha baphenduke amakhoba bengakaqedi nokukhula. Ukubhoka kwenkemane kwenza ukuba izigilamkhuba ziphendule imiphakathi izidleke zobugebengu.
Yilesi sizathu ebesigcwalisa izinkundla. Bekuchwaza amamashi phakathi neviki I-ANC ikhankasa. Bekuthi ngqoklo umsindo I-MK Party isishaya ujenga lwezimoto ezitaladini. Beziba bomvu tebhu izindlela abantu behalazela ukuya ethilogweni LE-EFF lemikhankaso. Bekukhala izihlonono I-IFP imemeza ngemibhobho ezimotweni ezijikeleza emigwaqeni.
Njengoba kuvotiwe izolo, kungaba yinto ephusile ukuba abaholi bepolitiki bazikhumbuze ngenhlupheko abayibone kubantu uma sebeqala ukwakha uhulumeni omusha.
Iningi labantu lilambile. Ukuklela kwabo eziteshini zokuvota izolo kube luphawu lokuthi basathembile ukuthi kukhona okuzoba ngcono. Kungayishwa uma kungaphela iminyaka emihlanu laba bavoti akade beyonikela ngethemba labo izolo bazizwe bengamathuluzi okondla osopolitiki nemindeni nobhululu babo kuphela.