Lubuyela enkantolo olwamalungelo kacaster
LUZOKWETHULWA phambi kwenxanxathela yamajaji kusukela ngolwesithathu, estrasbourg, efrance udaba lokuxhashazwa kwamalungelo omgijimi waseningizimu Afrika ucaster Semenya.
Ngonovemba nyakenye, inkantolo yase-europe yamalungelo abantu yadalula usuku lapho ikomiti elakhiwe ngamajaji angu-17, i-grand Chamber, ezolalela ngalo leli cala kulandela isikhalo sikahulumeni waseswitzerland ngesinqumo esakhishwa yile nkantolo ngonyaka odlule.
Ngojulayi nyakenye le nkantolo yakhipha isinqumo sokuthi amalungelo kasemenya awahlonishwanga ngenxa yemithetho eyabekwa yiworld Athletics ngo-2019.
Le mithetho ivimbela abesifazane abanezinga eliphezulu le-testosterone ngokwemvelo ukuthi bangenele imiqhudelwano yayo ngaphandle uma beyinciphisa ngemishanguzo emizimbeni yabo.
Usemenya, owanqoba igolide ebangeni lika-800m kwabesifazane kuma-olympic ango-2012 nango-2016, wabuye wathola nezindondo ezintathu zegolide emjahweni ofanayo kumaworld Championships, waqala ukuphikisana nale mithetho enkantolo yezemidlalo, i-court of Arbitration for Sport (CAS) elausanne, eswitzerland, kepha isinqumo sangamvuna.
Waqhubekela phambili waya enkantolo ephakeme yaseswitzerland, nayo eyakhipha isinqumo esimphikisayo. Kuze kwamhambela kahle ngesikhathi amajaji amane kwayisikhombisa enkantolo yase-europe yamalungelo abantu ekhipha isinqumo esimvunayo nyakenye.
La majaji athi udaba lwakhe alulalelwanga ngendlela efanele ezinkantolo zaseswitzerland.
Yize kwaphuma lesi sinqumo kodwa iworld Athletics yasheshe yakhombisa ukuthi ayinanhloso yokubuyekeza indlela eyalusingatha ngayo udaba lukasemenya nabanye abasesimweni esifana nesakhe.
Kunalokho yakhipha isitatimende iqinisekisa ukuthi ngeke iyishintshe imithetho yayo.
Kuzobonakala ukuthi lesi sinqumo esizokhishwa yigrand Chamber sizophinde simvune yini usemenya, nokuthi zizokwazi yini izinhlangano ezilwela amalungelo abantu ukufaka ingcindezi enkulu kwiworld Athletics ukuthi ichibiyele imithetho yayo.
Lo mthetho uthi abesifazane mabehlise i-testosterone emizimbeni yabo ibe ngaphansi kuka-2.5 nmol/l.
Ngofebhuwari nonyaka usemenya wacela ukunikelelwa imali yokubhekana nezindleko zabanye babameli abamsizayo kuleli cala.
Ngokusho kwabammeli bakhe abazinze kuleli, inorton Rose and Fullbright, kudingeka imali engaphezulu kuka-r3 million ukukhokhela abameli baphesheya okuyibona abanegunya lokuvela ezinkantolo zakhona.