Kuzobuyiswa ukuzethemba kwabondlekile ngokazime
KUHLOSWE ukuthi kubuyiswe ukuzethemba kwabesifazane abondlekile ngomzimba njengoba maduze umasipala wetheku, uzoklomelisa abesifazane abahambe phambili emcimbini kazime umiss ethekwini Curvaceous.
Umcimbi omkhulu wokugcina uzobanjelwa E-ICC ethekwini ngo-ephreli 26.
Kusuka ngenyanga edlule umasipala wetheku ngaphansi komnyango wamapaki, ezokungcebeleka namasiko ububamba inhlolokhono emalokishini ahlukene kuleli dolobha ukuthungatha abesifazane abazoqhudelana kulo mncintiswano.
Obambe njengesekela nhloko kulo mnyango, unksz Sindi Shangase uveze ukuthi nakulo nyaka bahlele ukwenza imicimbi ehlukene ukuthuthukisa intsha enamakhono anhlobonhlobo ethekwini.
“Engizoqala ngikubonge nje ukubona intsha iphuma iza kwinhlolokhono emalokishini ahlukene esesiwahambele okukhona kuwo ichatsworth, Hammarsdale, Pine Crest epinetown namaphakathi netheku njengoba sasiseworkshop.
“Inhlolokhono yokugcina sizoyibamba emlaza ngomgqibelo emlazi Mega City. Siyanxusa ukuthi abesifazane abanemizimba abazethembayo beze ngobuningi babo bezozama inhlanhla.
“Ngalo mcimbi sifuna ukubuyisa ukuzethemba kwabesifazane abakheke baba nemizimba.
“Ngezinye izikhathi bayazenyeza bangaziboni bebahle ngisho noma begqokile, ngakho-ke ngalo mcimbi sithi yithuba labo,” kusho usindi.
Uthe elinye ivangeli abafisa ukulishumayeza ngalo mcimbi elokuqeda isihlava sokucwasana nganoma iyiphi indlela.
“Asikhethe luhlanga simema wonke umuntu, kusukela kwabaneminyaka engu-16 kuya ku-21.
“Siphinde simeme abaneminyaka engu-22 kuya ku-35, lo mcimbi uzobe uhlukene izigaba ezimbili.
“Kukhona izinto ezahlukene esizibhekayo kubona bonke abafuna ukungenela, kodwa esikunxusa kakhulu makube yilabo abanomzimba ozimukile,” kuchaza yena.
Uthe intsha engalitholanga ithuba ingasebenzisa le mpelasonto esiya kuyo njengethuba lokugcina.