Imeya ebhekene nezembe isongela umbuso WE-ANC ethekwini
AMAQEMBU azimisele ngokukhipha imeya kamasipala wasemvoti, umnuz Philani Mavundla, afuna kushaye ulwesihlanu ingasekho esihlalweni.
I-ANC NE-IFP bafuna imenenja kamasipala, unksz Noxolo Ndaba, ibize umhlangano wokukhipha umavundla lungakashayi ulwesihlanu.
La maqembu athe azobhalela umphathiswa wezokubusa ngokubambisana nezindaba zomdabu Kwazulu-natal, unkk Bongi Sithole-moloi, amcele ukuthi ahlalise lo mhlangano uma unksz Ndaba kuze kwashaya ulwesihlanu esabhala ecisha.
Babhale le ncwadi emva kokuthi usomlomo womvothi, umnuz Mfundo Masondo, engazange awubize umhlangano wokuzodingida isiphakamiso sokungabethembi ubuholi bukamavundla.
Umasondo uyikhansela leqembu likamavundla,
I-ABC, naye kunesiphakamiso sokungabethembi ubuholi bakhe.
Amakhansela asayine isiphakamiso sokuthi kukhishwe umavundla, aweanc nawe-ifp. La maqembu anamakhansela angu-19, I-ABC inamakhansela ayisikhombisa.
Umavundla wangena kwesobumeya kulo masipala ngonyaka owedlule, emva kokulaxaza I-IFP ayebambisene nayo, wasebenzisana NE-ANC.
Muva nje, umavundla usexabene NE-ANC. Unobhala WE-ANC kwisifunda Inkosi Bhambatha, umnuz Lucky Khumalo, ukuqinisekisile ukuthi sebefuna ukuthi unksz Ndaba kube uye ohlela umhlangano.
Ukhumalo uthe bebengakavumelani ukuthi bazokwabelana kanjani izikhundla.
I-ANC inesikhundla sephini lemeya kulo masipala, lesi sikhundla siphethwe unkk Ntombi Ngubane.
Ukhumalo uthe umavundla uyena obalaxazile.
“Ngahlangana naye nonobhala WE-ABC (unkk Phumelele Phahla). Kulapho engafike ngahlangabezana nembibizane, umavundla engitshela ukuthi ngeke esasebenzisana nathi. Wathi usemdibi NE-IFP.”
Umavundla uthe I-ANC imlwisela umbono wakhe wokuthi ufuna ikwazulu-natal ithole uzimele gelekeqe.
Uthe unobhala WE-ANC Kwazulu-natal, umnuz Bheki Mtolo, umelene nalo mbono.
“Sike sayibanga naye le ndaba kwelinye iqoqo likawhatsapp. Umtolo wagcina esethi isikhundla sobumeya emvoti senza ukuthi ngizithwale. Waze wangisola ngokuthi ngisebenzisana namaqembu amancane ukuzama ukubakhipha. Kusobala lapha ukuthi ngishayelwa ukuzimela kwabantwana belikamthaniya.”
Umavundla uthe I-ANC iyakhohlwa ukuthi usanda kuyisindisa kumasipala wasethekwini kunesiphakamiso sokungabethembi ubuholi bemeya, umnuz Mxolisi Kaunda.
I-ABC ingelinye lamaqembu amancane avota NE-ANC kumasipala wasethekwini.
Umavundla uthe ngeke besavota NE-ANC ethekwini njengoba nayo ifuna ukumkhipha emvoti.