Abalinyazwa izikhukhula sebelahle ithemba kwi-anc
Ayizikhukhula BAKHAHLANYEZWA zango-2022, abasahlala ezakhiweni zesikhashana, bathi sebelilahlile ithemba kwi-anc.
Banxuse amaqembu angenele ukhetho Kwazulu-natal ukuba abakhiphe ezindaweni zesikhashana abahleli kuzo.
Lokhu bakusho ngesikhathi kunenkulumo-mpikiswano yamaqembu angenele ukhetho Kwazulunatal ebihlelwe iziko lezindaba elinguzakwabo wesolezwe, I-IOL.
Owakhahlamezwa yizikhukhula, unksz Sibongile Mkhize, utshele abebehambele inkulumo-mpikiswano ebisemhlanga izolo, ukuthi sebekhathele ukuhlala ezindaweni zesikhashana.
“Njengamanje kwelulwa inkontileka yakule ndawo esihlaliswe kuyona. Kwenzekani ngemali eyakhishwayo ukuba silekelelwe? Ngiyabonga nge-anc. Ngizalelwe kuyo, ubaba anginaye ngenxa yayo kodwa ayikho ingqubekela phambili.
“Kuyimanje sihlala ndawonye ezindlini. Akekho umuntu ongavuma ukuthi ahlale endlini nomuntu angamazi. Kuyimanje kuyaliwa, abantu bayafa. Sicela ukuthi kuthi kuphela izinyanga eyisithupha sibe sesiphumile lapha. Ayisancengani ngempela manje!”
Okhulumela I-ANC Kwazulu-natal, umnuz Mafika Mndebele, uthe iningi labantu abakhahlanyezwa yizikhukhula selahlelelwa izindlu.
“Cishe u-70% wabo usakhelwa izindlu.”
Umndebele uthe inkinga enkulu ukuthola umhlaba okuzokwakhelwa kuwo abantu.
Omele I-IFP Kwazulu-natal, umnuz Thami Ntuli, unxuse abakhahlanyezwa yizikhukhula ukuba bakhombise intukuthelo yabo okhethweni oluzayo.
“Ukulinda izinyanga eziyisithupha angeke kunisize ngalutho. Ninethuba lokuba nizwakalise uvo lwenu ezinsukwini ezizayo. Lisebenziseni ngobuhlakani leli thuba.”
Omele I-DA embangweni wesikhundla sikandunankulu wakwazulu-natal, umnuz Chris
Pappas, uthe uzokuba nomhlangano nabakhahlanyezwa izikhukhula.
“Akusithina esiphethe lapha ethekwini kodwa njengeqembu eliphikisayo umsebenzi wethu ukuthi sibange umsindo, ukuze labo abaphethe bezokwenza umsebenzi wabo.”
Ilungu LE-EFF, umnuz Magasela Mzobe, lithe kufanele kupheze ukwehliswa ngemilenze kwemali ekhishelwa ukusiza abasuke bekhahlanyezwe izikhukhula.
“Uhulumeni kufanele uthathe umhlaba ngaphandle kwesinxephezelo ukuze singeke sibe nenkinga yokuswelakala komhlaba wokwakhela abantu. Lokhu kukhona emqulwini wethu wezethembiso zokhetho.”
Omele irise Mzansi embangweni wesikhundla sikandunankulu wakwazulu-natal, unkk Nonkululeko Hlongwane-mhlongo, uthe bayavinjwa uma bethi bafuna ukulekelela abakhahlamezwa izikhukhula.
“Uma sifika emahholo sitshelwa ukuthi kunezingane ezingadlile, kunomamama abangenazingubo zokulala, sijikiswa emasangweni nosizo. Amakhansela angafuni ukusiza imiphakathi ayasijikisa thina esifika nosizo.”