ABE-ANC bacela osopolitiki bayeke ukuxova abantu
ABAHOLI BE-ANC okungunobhala wenhlangano Kwazulunatal umnuz Bheki Mtolo nongqongqoshe wezamanzi nokuhanjiswa kwendle, umnuz Senzo Mchunu, banxuse osopolitiki bamaqembu ehlukene ukuthi bayeke ukuxova abantu abagcina bengasabhekani ekubeni bona (osopolitiki) behleka kuze kuvele elomhlathi uma sebehlangana ephalamende.
Laba baholi bathe kumele kukhankaswe ngokuthula njengoba kubhekwe okhethweni lukazwelonke ngenyanga ezayo.
Umtolo uthe kuyakhathaza ukuthi abaholi bamaqembu ehlukene, baxabanise abantu abangamalungu noma abaseka amaqembu baze bangabhekani, ekubeni osopolitiki bezwana.
“Uthola ukuthi uma sesihlangana ephalamende singabaholi bamaqembu ehlukene, siyazwana futhi sihleka kuze kuvele elomhlathi ekubeni emphakathini sixove abantu, abangasabhekani. Uthola thina sitetemuka ngamabhanoyi ndawonye, sidle amakhekhe ekubeni abantu bethu bona bayalwa. Ayiphele le nto kube nokuthula,” kusho umtolo.
Nomchunu uhambe emazwini kamtolo, wathi kubalulekile ukuthi ukhetho lube nokuthula.
Bakusho lokhu ngempelasonto, ngesikhathi behambele enkosini yesizwe sakwamandlakazi, Kwanongoma lapho bebeyochaza ngezinhlelo zokulethwa kwamanzi nomtholampilo.
Umphathiswa wezempilo esifundazweni, unksz Nomagugu Simelane, uthe seziqalile izinhlelo zokwakha lo mtholampilo njengoba sekuvulwe nesiza.
Uthe sebehlonziwe abahlengikazi abazosebenza kuwona, wathi umsebenzi wokuwakha uzoqala.
Umchunu uveze ukuthi sekukhishwe ur165 million, wokulungisa inkinga yamanzi kule ndawo.
Uthe bazokwakha isakhiwo edamini ijozini ukuze le ndawo ithole amanzi kanjalo nakubo Kwahlabisa njengoba engekho.
“Lubuyele emnyangweni wami uhlelo lokuphakela amanzi ezindaweni ezehlukene enyakatho yesifundazwe imandlakazi Water Scheme isuka kumasipala wesifunda izululand ngoba kukhona izinkinga ezikhona. Umphakathi wakule ndawo uzowathola amanzi.”
Umchunu uphinde wathembisa nokuthi ekuqaleni kwenyanga ezayo uzobuyela Kwaximba, njengoba amanzi azobe esephuma.
“Ngaya Kwaximba umphakathi ukhala ngenkinga yamanzi ngafike ngathembisa ukuthi ngizobuya ekupheleni kwale nyanga. Ngiyabuyela khona ngomeyi 2, lapho amanzi ezobe esephuma njengokuthembisa kwami. Asizenzi izethembiso esingazigcini.”
Uthe bahambisa intuthuko noma kungathiwa abantu ababavoteli.
Umtolo uthe bazophinde basiphathe isifundazwe ngoba abantu bayathembela kwi-anc.