Kukhonondwa ngokuqashana ngokobuqembu kwakhiwa ibhuloho
KUPHAZAMISEKE izinhlelo zokwakhiwa kwebhuloho elinqamula umfula umdloti ogunjini phakathi kukamasipala wasendwedwe nowasethekwini, kubangwa ukuqashana ngokobuqembu.
Ibhuloho elethulwe ngomashi nyakenye okulindekele ukuthi lidle ur79 million, bekubhekeke ukuthi liphothulwe ngodisemba nyakenye. Kunomdonsiswano emphakathini njengoba abanye besola ukuqashwa kwamavolontiya E-ANC nezihlobo.
Isishoshovu esilwela amalungelo omphakathi kuleya ndawo, umnuz Nhlanhla Mfeka, sithe indaba iqale ngokuqashwa kwelungu lomphakathi umnuz Simangenkosi Magwaza, obesehlolwe nawudokotela kubhekwa isimo sempilo yakhe, okukholakala ukuthi abe-anc babhikishele ukuthi ahoxiswe ngoba eyimk Party.
“Ngokubona ukuthi le nto seyingenwa yipolitiki, nginikele esayithini ngenhloso yokucaciseleka ngalolu daba. Ngithole ukuthi kunowesifazane ngaphakathi osebenzayo, owumgqugquzeli WE-ANC kwi-ward omeme amalungu E-ANC ukuthi abhikishele umagwaza ukuthi ahoxiswe ngenxa yokumataniswa nemk. Ngicele umhlangano nekhansela, eligcine lifika ngolwesihlanu esayithini lihamba nequlu labebegqoke izikibha ZE-ANC,” usho kanje.
Uthe ngesikhathi bexoxa nomnuz Nkosiyezwe Mhlongo (ikhansela) uveze ukuthi ukwakhiwa kwebhuloho wuhlelo lwe-anc, okwenze wazama ukumkhalima njengoba emkhumbuze ukuthi uyikhansela lomphakathi. Uthe okunye okukhalisa abantu, ukuqashwa kwababili bandawonye ekubeni kunemizi okungekho muntu osebenzayo kuyo, okuvunyelwane ngokuthi kumele lilungiswe “leli phutha” njengoba nomhlongo elivumile.
Umagwaza ukuqinisekisile ukuthi ukhishwe eseqashiwe ngoba kuthiwa uyilungu lemk Party. Elandisa uthe wayefake isicelo sohlelo lwabafundi kusonkontileka, okuthe uma kubhekwa iminyaka yakhe kwatholakala ukuthi usekhulile njengoba kuwuhlelo olunikezwa intsha, wabe eseqashwa njengomsebenzi nje ojwayelekile, esehlolwe nawudokotela watshelwa ukuthi kukhona abafuna angathathwa ngoba esekwimk Party.
Elinye ilungu lomphakathi elingathandanga ukudalulwa, likugcizelele eyokuqasha ngokwenzelela.
“Kuqashwa amavolontiya E-ANC noma abangani okukanye izihlobo. Asigculisekile ngohlelo okuqashwa ngalo, futhi ikhansela alimemezeli ukuthi kuzoqashwa kodwa ubona ngabantu sebesebenza okuyinto engeyinhle ngoba abantu bonke bayawudinga umsebenzi,” usho kanje
Umhlongo uziphikile izinsolo zokuqasha ngobuqembu.
“Ngingakuqinisekisa ukuthi kube khona ukuphazamiseka ngolwesihlanu, kodwa ngikwazile ukunikeza incazelo eqondile kubantu ngemigudu elandelwayo uma kuqashwa. Nginethemba lokuthi ukusebenza kuzoqhubeka ngokwejwayelekile namhlanje. Ngesikhathi ngifika, bekunababegqoke izikibha zemk Party befuna ukuqashwa, kodwa ngakuveza ukuthi kunekomiti elibhekele ukuqashwa kwabantu, ngakho akukuhle ukuphazamisa intuthuko yomphakathi kufakwa ipolitiki lapho ingadingeki khona,” usho kanje.
Usonkontileka wesibili othathe umsebenzi wokwakhiwa kwebhuloho njengoba ubeke wathulwa phambili owokuqala, wahluleka ukuphothula umsebenzi. Ukumuka kwemoto yabasebenzi kumasipala wetheku eyayinabasebenzi ababili kuleya ndawo ngesikhathi kugasela izikhukhula zango-2022, kwaba wundabamlonyeni. Ngaphandle kwalaba basebenzi ziningi ezinye izidumbu eseziphumile kulo ikakhulukazi uma kungenise umfula lina ngoba abanye badlula kulo uma beya esibhedlela osindisweni noma beya emsebenzini everulam.