Abepiggy Farm baphika eyokuba yibhanoyi
BAPHIKA izinsolo zokuthi bayibhanoyi abepiggy Farm Trading emuva kokuthi inhlangano elwela amalungelo abathengi inational Consumer Commission, ithe isiqale uphenyo ngale nkampani ethi inezimpawu zokuba yibhanoyi.
Umnuz Soweto Mandlanzi othe ucelwe ukuba abe ngumkhulumeli wepiggy
Farm Trading, utshele Isolezwe ukuthi abasilo ibhanoyi kodwa banamapulazi ezingulube.
“Sinazo izingulube esizidayisayo futhi abantu bangazibona emapulazini ethu asemhlanga, Hillcrest nasemgungundlovu.
“Akusilona iqiniso ukuthi siyibhanoyi, mhlawumbe okudide INCC namabhange wukuthi abantu bebenomdlandla wokuthenga izingulube ebezigcinwe emapulazini epiggy Farm Trading,” kusho umandlanzi.
Ebuzwa ukuthi abantu ababetshale imali yabo epiggy Farm bazoyithola nini, uthe okwamanje abakwazi ukunyakaza njengoba amaakhawunti esaphenywa.
“Uma INPA nezinye izinhlaka sebephothule uphenyo ipiggy Farm Trading izobe isikwazi ukukhokhela abantu imali yabo. Abantu bayazi ukuthi bebekhokheleka kahle ngaphambi kokuthi kuvalwe ama-akhawunti epiggy Farm. Asibalekile, amahhovisi asavuliwe, siyayiphendula nemibuzo yabantu,” kusho umandlanzi.
Isolezwe lizamile ukuthola abatshale imali epiggy Farm Trading kodwa iningi labo linqabile ukukhuluma.
Oyedwa okhulumile, ucele ukungadalulwa wathi wayethenge izingulube ezimbili kodwa kuye kwaba nezinkinga sekufanele athole imali yakhe ngonyaka odlule.
Uthe waze wafakelwa imali ngomunye wabasebenzi bepiggy Farm Trading abasemahhovisi ale nkampani ethekwini.
Ebuzwa ukuthi ngabe uzolivula yini icala, uthe ngeke alivule ngoba wagcina eyitholile imali yakhe.
I-NCC ithe isamile ekutheni ipiggy Farm Trading iyibhanoyi ngoba ibiheha abantu ezinkundleni zokuxhumana ukuba bathenge izingulube ezingafiki kubona ngor2 750.
Bebethenjiswa ukuthi bazokhokhelwa ur500 njalo ngenyanga kuze kuphele izinyanga eziwu-12. Okusho ukuthi bebezokwenza ur6 000 ngokuthenga ingulube eyodwa ngonyaka.
“Sicela abantu bazi ukuthi ukutshala imali ebhanoyini kuyicala, akufanele futhi bakhuthaze nabanye ukuthi bangene kulo.
“Ucwaningo lwethu luveza ukuthi ayanda amabhanoyi asebenzisa ezolimo ukuheha abantu. Uma umuntu ethenga imfuyo kufanele ayibone hhayi ukuthi athenge imfuyo engabonakali,” kusho INCC esitatimendeni.
Uphiko lwezokushushisa, inational Prosecuting Authority (NPA) lumemezele ukuthi lunegunya lokuvala i-akhawunti yepiggy Farm Trading enor4.3 million njengoba luphenya okwenzeka kule nkampani.
Elinye iphephandaba elibhala online libike ukuthi inedbank ivale i-akhawunti yepiggy Farm Trading ebinor16 million.
Khonamanjalo, ifinancial Sector Conduct Authority
(FSCA) isixwayise abantu ngokutshala imali enkampanini ebizwa nge-indiberries & Co. Le nkampani nayo iheha abantu ukuthi batshale imali kumaberries isebenzisa izinkundla zokuxhumana.
I-FSCA ithe le nkampani ayibhalisiwe ngokusemthethweni futhi ithembisa abantu inzalo engakholakali ka-45% ngenyanga.
Icele abantu ukuthi ngaphambi kokutshala imali yabo babheke ukuthi izinkampani zibhaliswe ngokusemthethweni yini, ngokushayela u-0800 110 443 noma bangene ku-https://www.fsca. co.za/regulated%20entities/ Pages/list-regulated-entitiespersons.aspx.