Wayeqinisile ushenge uma ethi izwe libole phuhlu yinkohlakalo
MHLELI: Inkosi MG Buthelezi yayimelelene nenkohlakalo impilo yayo yonke. Muva yayisivame ukuthi kubolile phuhlu kuhulumeni, inkohlakalo inuka phu phu, inukela ngisho unkulunkulu ezulwini. Abanye babekuthatha njengehlaya nanokuthi wabe ezihhemela nje okamkhandumba.
Akukudala, mhleli, sifunda kulo leli phephandaba lesizwe sibuka nakothelevishini nasemisakazweni imenenja kamasipala wasemsunduzi, umnuz Lulamile Mapholoba, ethi wabizwa imeya kamasipala nonobhala wesifunda sasemgungundlovu bamtshela ukuthi bayammisa emsebenzini.
Isizathu wabe exoshe abantu ababentshontsha imali, abanye wabamisa. Uthi bathi le nto ayenzile ixosha ama“comrades” ngeke esalivotela iqembu.
Umbuzo uthi kumele abantu beyekwe bantshontshe ukuze kuncengwe amavoti abo na? Omunye wabaxoshwa wathathwa wayoshuthekwa emnyangweni wezamanzi. Kufakazela into eyayishiwo unksz Sibongile Makoti Khawula WE-EFF, owayethi:
“Niyeba, niyizigebengu, umuntu untshontsha la, nimsuse nimfake komunye umnyango, antshontshe futhi nimshushumbise niyomfaka komunye, lamasela la,” kusho umahlongwa.
Umhlonishwa umama Nosiviwe Nqakula wayewaphebeza amalungu amaqembu aphikisayo ejijimeza umengameli Cyril Ramaphosa ngodaba lwasephalaphala.
Ngenkathi kuvumbuka izinsolo zenkohlakalo ngaye unkk Nqakula, umengameli wezwe nosotswebhu omkhulu WE-ANC unkk Pemmy Majodina yibona abokuqala abazichitha izinsolo zenkohlakalo ezazibhekiswe kusomlomo osemanzini abilayo kumanje.
Okubuhlungu usomlomo akasaphiki lutho, kodwa usekhala ngokuthi usemdala nempilo yakhe isibuthaka, ngeke esalunga ukuyovalelwa.
Umbuzo uthi webelani umuntu esemdala?
Akasabi yini ukuthi uma eseboshwa uzothela izingane zakhe nabazukulu ngehlazo, athele ngehlazo ibandla akhonza kulo nomfundisi wakhe? Kuyaye kuthiwe icala aliboli. Unksz Nomagugu Luzulane owake waba imeya kumasipala i-dr Nkosazana Dlamini-zuma, uboshwe ngenyanga edlule ngenkohlakalo ayenza ngo-2013. Kumanje ubhadla ejele.
Asazi-ke ukuthi nosomlomo ubheke ejele na. Inkohlakalo inkulu kakhulu ezweni futhi ayifihliwe. Ngisho abakhuluma udede ngayo abanakwa.
Owabe engumengameli wengcuce embuthweni wesizwe, umama ubathabile Dlamini, wathusa izwe ethi: “akekho ongenaso isiguruguru nobushompeshompe bakhe embuthweni wesizwe. Wayengaphothi lumbo usibalukhulu. Wazi kahle ngoba naye uyingxenye yombutho wesizwe.
Into esuke yakhelwe phezu kobusathane, ubuqili, ubugebengu futhi unkulunkulu ebekwe ngaphandle, igcina isinalezi zibi esizibonayo ezweni.