Isosha ladubula kasithupha libulala umkalo: umbuso
ISOSHA ladubula amahlandla ayisithupha emqaleni nasesifubeni labulala inkosikazi yalo emzini wabo epinetown, ethekwini.
Lokhu kuqukethwe edokodweni lombuso elifundwe enkantolo yemantshi yasepinetown izolo.
Umbuso uphinde walishintsha icala obekungelokubulala elithweswe isosha lombutho wezempi eningizimu Afrika, umnuz Lwanda Zungu laba elokubulala okuhleliwe unkk Tania Zungu.
Umshushisi umnuz Ehud-jadon Francko utshele inkantolo ukuthi icala seliwela esigabeni sesithupha.
Lokhu kuchaza ukuthi uzungu kumele ashaye indesheni ngokuthi abeke izizathu ezimqoka zokuthi kungani imantshi kumele imnike ibheyili.
Isenzo sombuso kubukeka sinyakazise ummeli kazungu, u-advocate Muzi Mzelemu, othe bebeqala ukuzwa enkantolo izolo ukuthi selishintshiwe icala.
Umzelemu usukume wafaka isicelo esiphuthumayo, ephikisana nokushintshwa kwecala.
Uveze ukuthi uzungu, sekuphele izinyanga ezintathu egqunywe ezitokisini akaze acaciselwe ngamacala athweswe wona nokuthi enzeka kanjani.
“Umbuso ufike kanjani ekutheni kwakuyisigameko esihleliwe okwenzeka. Siphi isitifiketi sikamqondisi wabashushisi esishoyo ukuthi icala seliwela esigabeni sesithupha?” kubuza umzelemu.
Umshushisi uvumile ukuthi asikho futhi uxhumene nehhovisi likamqondisi wabashushisi esicela.
Imantshi ibe isilihlehlisela namuhla ukuze kuqhutshekwe nesicelo sebheyili. Ngaphambi kwalokho umzelemu ubefuna kuqhutshekwe nokulalelwa kwebheyili ethi umbuso awusebenzise imininingwane esedokodweni ngoba inohla lokuzobe kuqukethwe esitifiketini esifunekayo.
Imantshi beyiqale yatshela uzungu ukuthi uma limlahla icala athweswe lona angabhadla ejele iminyaka engu-25.
Uzungu ubebukeka ekude ngokomqondo ehlezi ebhokisini labasolwa. Uqale kwangathi kunento ayikhuluma yedwa, ejeqeza abangena enkantolo kodwa kungezwakali ukuthi ubekade ethini.
Inkantolo beyikade igcwele abantu abebekade bezokweseka umndeni kamufi nezihlobo zakhe. Bekukhona nabebekade begqoke izikibha ebezinemibhalo eqwashisa ngokuhlukunyezwa kwabesifazane nezingane.
Uzungu usolwa ngokudubula abulale inkosikazi yakhe ngojanuwari nonyaka. Abomndeni kamufi basola uzungu ngokuhlukumeza umufi waze wambulala.
Ngakolunye uhlangothi umufi usolwa ngokuthi waphinga nomuntu abazanayo nozungu nokuyinto eyaholela ekutheni ambulale.