Uqale ngegiya eliphezulu owezlm Cup
UQALE ngesasasa umqhudelwano webhola womkhumulajezi obubhekwe ngabomvu IZLM Project Cup ngempelasonto, ezinkundleni ezahlukene, ethekwini.
Kulo mqhudelwano okudlana kuwona imilala amaqembu angu-20 adlala esigabeni sesafa Kwazulu-natal ABC Motsepe League, uqale ngomgqibelo odlule kanti uzoqhubeka kule mpelasonto, usongwe ngomashi 23.
Iqembu elizodla umhlanganiso lizokhala lemuke no-r100 000 nendebe, elizolala isibili lithole u-r50 000, isithathu kube u-r20 000, isine kube wu-r10 000.
Imidlalo yeligi YEKZN ABC Motsepe isamisiwe, iyoze iqhutshekwe uma sekuphothulwe wona lo mqhudelwano. Emzuliswaneni wokuqala bekunemidlalo engu-16 lapho iqembu ngalinye belidlala imidlalo emibili lilodwa njengoba kuseyisigaba samaqoqo. Amaqembu azohlala esicongweni uma sekuphothulwe amaqoqo yiwona azodlala owandulela owamanqamu.
Awaqalanga kahle amaqembu okuyiwona abebhekwe kakhulu kwizlm Project Cup ngenxa yefomu yawo kule sizini kwikzn Motsepe League. Kulawo maqembu kubalwa umkhambathi FC oqhwakele kustream B, umsinga United FC osembangweni wesicoco kuwona ustream B, umkhumbane Classic oqhwakele kustream A, injampela FC elinganayo ngamaphuzu nomkhumbane kustream A, nedrakensberg FC nayo esembangweni weligi kustream B.
Umkhambathi udlale ngokulingana umdlalo owodwa, wanqoba owodwa okuchaza ukuthi unamaphuzu amane, umsinga wona udlale ngokulingana imidlalo emibili, waqoqa amaphuzu amabili.
Umkhumbane wona obuwenza kahle kulezi zinsuku unqobe umdlalo owodwa, wahlulwa kwowodwa okuchaza ukuthi banamaphuzu amathathu.
Injampela inamaphuzu amane kulandela ukudlala ngokulingana, yase inqoba kanye. Idrakensberg yona idlale ngokulingana yomibili imidlalo yayo.
I-ozyn Academy ayifikanga emidlalweni, yagingqelwa. Ikugroup B, iqhathwe ne-asande eqhwakele ngamaphuzu ayisithupha, injampela, Umsinga onamaphuzu amabili, neswayimane United eselilodwa.