Qeda ‘ukungaziluli’ emsebenzini
ABANTU abaningi bayazi ukuthi yini ukutubeka emsebenzini – okuyisimo esibanga ukhwantalala kakhulu, ukukhathala nokugqilazeka okungaphazamisa umsebenzi womuntu ngendlela eyisimanga, impilo yakhe ekhaya nenhlalonhle yakhe jikelele.
Kunesinye isimo esikhona emhlabeni sokungaphili esibangwa wumsebenzi ongakuniki inselelo, phecelezi “i-boreout”.
Lesi simo sibonakala ngokwehlelwa wumdlandla nothando oluncane lokwenza umsebenzi nokubona ukuthi kuhlale kwenziwa into eyodwa njalo, ukuswela amandla emsebenzini noma ukukhululeka kakhulu njalo emsebenzini.
UMPHUMELA OMUBI
Nakuba umsebenzi ongakuniki inselelo ungafani nomsebenzi otubayo, kepha nawo ungenze kwehle izinga lokusebenza nokweneliseka emsebenzini, okudala umphumela ongemuhle ezingeni lempilo nasemathubeni okukhula emsebenzini.
Ukuzwa wenza umsebenzi ongakuniki inselelo kwenzeka uma ungazizwa usebenzisa amakhono akho futhi wenza into oyithandayo emsebenzi. Ngenhlanhla ukukwazi ukubona ukuthi uyavilapha emsebenzini kungaba yimbangela yokuthi ungasebenzi ngokuzinikela, hhayi ngenxa yezinye izinselelo, okuyinto yokuqala yokushintsha izinto wenze into engakuphumelelisa.
Ukuzwa wenza umsebenzi ongakuniki inselelo akusiyo into eyokwenzeka noma kanjani noma engeke yashintsheka, kanti ziningi izindlela ongalungisa izinto ngayo emsebenzini.
Ngaphezu kwalokho, izimenenja nabaholi kukhona abangakwenza ukuqinisekisa ukuthi amathimba abo asebenza kahle. Ngalesi sikhathi sonyaka abasebenzi abaningi basuke sekubuyekezwe umsebenzi wabo. Nokho lokhu kubuyekezwa komsebenzi kubheka izinto esezenzekile, kugxile ekuphuculeni indlela yokusebenza kunobheka ukuthi abasebenzi bafuna umsebenzi obanika inselelo nabawuthandayo.
Ukuzwa wenza umsebenzi ongakuniki inselelo kungazwakala kuyinkinga encane kanti empeleni akunjalo neze, ngakho abaqashi kufanele baqaphele. Kungaholela ekunyukeni kwezindleko zokusebenza, ngenxa yokuthi abasebenzi abanesithukuthezi bayazihudula emsebenzini, benza amaphutha amaningi noma bachithe isikhathi ezintweni ezingathi shu.
Okunye futhi wukuthi kungaholela ekuvame ukuhamba kwabasebenzi abaningi ngenxa yokuthi abasebenzi babulawa yisithukuthezi, abajabule noma abanamdandla bese beyofuna omunye umsebenzi onenselelo noma ohlukile.
UMBONO OMUSHA
Ukuqala yisikhathi esihle sokuthi abaphathi basize amathimba abo aqhamuke nombono omusha.
Ikhambi lokutubeka emsebenzi wukunciphisa umthamo womsebenzi. Ekuzweni wenza umsebenzi ongakuniki inselelo, ikhambi wukuthi ubheke izindlela zokuvuselela uthando nokuqhubukela ekwenzeni izinto ezintsha.
Ukubona izinselelo ezintsha kumqoka, kanti ngisho izinselelo ezincane zingavuselela umdandla.
Lokhu ungakwenza ngokubheka amathuba amasha, ukufunda amakhono amasha nokwenza eminye imisebenzi nokuhlale ubuza kubaphathi emsebenzini ukuthi kuhamba kanjani.
Isithiyo sokuqala nesikhulu kulabo bantu abazibona besesimweni sokwenza umsebenzi ongabaniki inselelo wokuthi bona uqobo baqale ukunyakaza ukuzivuselela. Ukubona ukuthi kwenzekani nokuzinika inselelo endaweni elula kodwa engemnandi wukubheka amathuba amasha nezinselelo ezintsha, okunamathuba amaningi okukuklamela indima entsha yempumelelo.
* U-naidoo ungumqondisi ejack Hammer Africa