Ukanu akatatazeliswa ukubhekana nezembe
AKUYONA into esemqondweni womqeqeshi werichards Bay FC, uvusumuzi “Kanu” Vilakazi, ukuthi kungenzeka iqembu lakhe ligawulwe yizembe, yize lishayelwe ekhaya ngempelasonto.
Inatal Rich Boyz iphume ilengise izandla eking Zwelithhini Stadium, emlaza, ngomgqibelo ebusuku, kulandela ukuthelwa phansi yiroyal AM ngo 2-1 emdlalweni womkhaya bakwazulu-natal.
Kuyiwe ekhefini zibambene ngo 0-0 kodwa ithwihli Thwahla yazithola isihamba phambili ngo 2-0 maphakathi nesesibili ngamaphenathi abekwe phakathi ngumotebang Sera nomenzi Masuku.
Ibay ibuye ngegoli elivalelwe nguyanela Mbuthuma emzuzwini ka-74, yaphinde yazama ukuthola elokulinganisa kodwa kwanhlanga zimuka nomoya.
"Akuwona umphumela ebesiwubhekile. Bekufanele sikusebenzise ukuthi besidlalela ekhaya, sizame ukuthola amaphuzu aphelele. Uma ngikhuluma iqiniso, ngiphatheke kabuhlungu ngenxa yokuzimisela kwabadlali bami. Ngingasho nje ukuthi asibanga nayo inhlanhla yokusebenzisa amathuba esiwatholile. Sithole amathuba angaphezu kwayisikhombisa kodwa sahluleka ukuwabeka enethini,” kusho uvilakazi.
"Ngicabanga ukuthi besingamaka kangcono ebhokisini ukuze sigweme ukudala amaphenathi. Akufani ukumaka ngaphakathi nangaphandle kwebhokisi. Njengoba sinabadlali abafana nomaboe kufanele sikwamukele ukuthi basafunda. Sifunda kanzima ngamaphutha esiwenzayo.
"Umphumela obhalwe phansi awukuchazi kahle okwenzeke emdlalweni. Kodwa-ke kulungile. Kufanele sikudlulise lokho sibheke emdlalweni ozayo.”
Nakuba ebone sengathi ezakhe bezingenza kangcono emuva, uvilakazi ukhalile ngezinqumo ezenziwe ngunompempe, uluxolo Badi, okuhlanganisa namaphenathi amabili awanike iroyal AM.
Lo nompempe uke wamiswa yinhlangano eyengamele ibhola kuleli, isouth African Football Association, ngosepthemba nyakenye, kulandela umdlalo WEMTN 8 owawuphakathi kwekaizer Chiefs nemamelodi Sundowns lapho asolwa khona ngokuncisha Amakhosi iphenathi.
“Kangigculisekanga ngezinqumo zikanompempe kodwa akuyona indawo yami ukuphawula ngalokho. Bayabonakala abantu abafika nezinhloso zabo ongeke uzazi wena. Ngicabanga ukuthi unompempe ubengekho ngasohlangothini lwethu, besingamnukeli kamnandi,” usho kanje lo mqeqeshi.
"Namaphenathi awabekile, bengiqala ukubona unompempe ebeka iphenathi ngisho izitha zingayikhalelanga. Nazo bezishaqekile. Lokho akudwebi isithombe esihle ngezinga lonompempe baseningizimu Afrika. Kodwa-ke ukukhala akusizi, kumele sigxile emdlalweni ozayo.”
Ezikavilakazi zisendaweni ka-15 ngamaphuzu angu-13 emidlaleni engu-18. Zisele ngayisikhombisa kwimoroka Swallows, esendaweni ka-14.
Umdlalo olandelayo zizowudlala nechippa United enelson Mandela bay Stadium ngolwesithathu ngo-7.30 ebusuku.
"Leli qembu ngeke liye ehlathini. Ngizonikhumbuza ekupheleni kwesizini. Sizolwa, sibumbene futhi sinezinhloso ezifanayo. Iqembu liyazethemba. Sizoqinisekisa ukuthi sisebenza ngokuzikhandla ukuze sithole esikudingayo kule midlalo engu10 esele,” kuphetha uvilakazi.