Kuyadabukisa ukuthi namanje kusenomhlaba wethu okwabamhlophe
MHLELI: Ngenyanga ezayo kuzophela iminyaka ewu-30 sathola ‘inkululelo’ kodwa umhlaba awukakabuyeli kubanikazi bawo bendabuko. Muva nje ngike ngaya ophongolo esizweni sasemagazini kwantshangase.
Uma uphuma kancane edolobheni emtuba wehla ngon2, kunowatela nogamthilini engxenyeni yesizwe sakwamkhwanazi. Kuthiwa eyabelungu, kukhona futhi nemizi yabantu.
Uma uwela umfula ihluhluwe ngasesandleni sokunxele kunomhlaba omkhulu ongamapulazi abamhlophe, uhamba uze ufike edolobheni ehluhluwe kungenamizi. Ngiyacabanga ukuthi kwakuyizwe lasemdletsheni lingakaqolwa abelungu. Uma usuka ehluhluwe wehlela emkhuze ngesifanayo.
Kunodukathole beziqiwu zabamhlophe. Uma usuka emkhuze edolobheni uwela umkhuze yiso leso. Phambili ungakafiki Ophongolo kunesiqeshana esincane somhlaba nesizwe senkosi TM Gumbi. Akukwazi ukuthi izwe leqhawe inkosi Somkhanda kamagonondo Ingobamakhosi yakwagumbi emvokweni eyalekelela isilo udinuzulu ilwa nomandlakazi etshaneni ngo 5 Juni 1884 ingaba nesiqeshana esingakaya somhlaba.
Uyabona ukuthi indawo yasemvokweni yayehla ize iyovinjwa yijozini Dam kodwa ngezansi komgwaqo sekuvimbe iziqiwu zabamhlophe. Kafushane nje Mhleli ukusuka emtuba uye ophongolo umhlaba usekubelungu.
Manje kuyadabukisa uma uzwa abantu abakhankasela ukhetho futhi abake baba nethuba bethi uma benqoba bazobuyisa umhlaba bephotha ilumbo. Kwazulu kwakulwelwa umhlaba, isifazane nezinkomo. Namanje umhlaba ukubacindezeli, namanje isimame siyabulawa siyadlwengulwa ukudlula kusaphethe uhulumeni wabacindezeli, namanje onkomo ningi yibo abamhlophe abagebenga izinkomo zokhokho bazeba baziklayela odedangendlale bomhlaba, bawubiya bafaka izinkomo zokwebiwa kubo.
Abengwadi abakaze bafike nankomo kuleli. Okwenzeka bazeba, baba nobuhlakani bathatha isidoda senyathi basifaka ezinkomeni zokhokho kwazaleka ama-blaman. Namuhla ama-blaman abizwa ngezinkomo zesilungu, akushiwo ukuthi zakhelwe esisekelweni sobugebengu babamhlophe abagebenga ngakho okhokho.
Akusiyona yodwa indawo esenyakatho nelakwazulu esanqwahwe abamhlophe cishe isifundazwe sonke, ngithinta nje lena ngoba ngisanda kuya kuyo futhi ivulekile ibonakala kahle uma uhamba ngo-n2.
Angigcine ngokubonga nomnuz Buthelezi umphathi siteshi wasophongolo owasiluleka ngokuthi asingathathi ngewala sesigejana nelinye ibhunu lepulazi eliwunkomoningi nalo.
Asadelela amabhunu namanje, awazi nakwazi, futhi uma kusenje, kukhomba ukuthi akukakhiwa kwamthaniya kusagotshwe amadlangala.
EMPANGENI