Selokhu kwathi nhlo umbuso kazulu usemseni wosopolitiki
NGESIKHATHI undunankulu wesifundazwe, unkk Nomusa Dube-ncube, ethula inkulumo ngesimo sesifundazwe ngeviki eledlule umemezele ukuthi kunezinhlelo zokwakha isigodlo esisha sesilo umisuzulu Sinqobile kazwelithini Kwanongoma.
Lesi yisinqumo esinqala nesihle esizweni sikazulu njengalokhu unomthebe waso ebengakabi nesigodlo endaweni enomlando wokuba yihlalankosi Kwazulu. Unongoma yilapho iningi lezigodlo zakhele khona. Yebo, isilo sizinze esigodlweni esisanda kulungiswa kwankomonye ondini kodwa bekungakacaci ukuthi le ndawo isingathathwa njengesizinda esikhulu sesilo esibusayo njengamanje.
Kusalokhu kunechashaza nokho ekutheni izinhlelo zalo hulumeni wesifundazwe zokudedela ngokugcwele ukusebenza ngokuzimele kwendlunkulu kazulu zimiphi. Futhi lokhu akuqalanga ngesikhathi sekubusa I-ANC esifundazweni, kwakunje naphambilini kusaphethe I-IFP.
Selokhu kwathi nhlo umbuso kazulu usemseni wosopolitiki. Ngisho sekungene intando yabantu. Phakathi kwezinto ezinganambithisiseki ngalesi simo, ukuphila ngokukhangezwa kwendlunkulu amanconzunconzu nguhulumeni. Lokhu kubangela ukuthi noma yimuphi usopolitiki osemandleni kuba nguye oshaya ufayifi ekuphathweni kwezinto zasendlunkulu.
Ngo-2009 kwasungulwa uphiko lwe-kwazulunatal Royal Household Trust okwakubhekwe ukuthi luzokwengamela izindaba zasendlunkulu luphinde lulawule isabelomali esibhekene nayo. Kodwa okusobala ukuthi yigama nje ukuthi kunalolu phiko, osombangazwe basagxamalazele konke. Lesi sikhwama sifana nehhovisana nje elingaphakathi kwelikandunankulu wesifundazwe.
Ngeshwa lesi simo sisazoqhubeka sidale isithombe sokuthi imisebenzi yesizwe neyasendlunkulu iyibhola eligendwa osopolitiki emdlalweni wabo wombango wevoti. Nemifantu eklaya indlunkulu nayo kayelekeleli kule nselelo, ngaleyo ndlela abezombusazwe basazoba oqhozasi kule sekisi.