Ekawilliams iyisifundo sokuvuka uzithathe-de Sa
OKWENZIWE ngunozinti webafana Bafana, uronwen Williams, evimba amaphenathi amane emdlalweni we-africa Cup of Nations (Afcon), kufanele kube yisifundo kunoma imuphi umuntu waseningizimu Afrika ngobumqoka bokuthi ziqale zikunethe ngaphambi kokuqina ukhakhayi.
Lokhu kushiwo nguroger De Sa, owayengomunye wonozinti abasiza ibafana ngesikhathi idla isicoco se-afcon ngo-1996.
Uwilliams (32) uzakhele ugazi nakubathandi bebhola lase-afrika ngesikhathi evimba amaphenathi amane kwamahlanu obekuyinto engakaze yenzeke emlandweni we-afcon.
Uphenduka iqhawe nje, ngo-2014 wayesezintini ngesikhathi ibrazil ihlelela indebe yomhlaba ibhabhadisa ibafana ngo 5-0 E-FNB Stadium. Kulo mdlalo, uwilliams wayeqala ukuvimbela iqembu lesizwe.. Kusukela lapho, indaba ka 5-0 webrazil ayikaze iyeke ukulandela lo nozinti wasegqeberha. Lokhu kufakazelwe nawukuthengwa kwakhe yimamelodi Sundowns kwisupersport United.
UDE Sa, oyiphini lomqeqeshi eqenjini lesizwe laseqatar, ubekhuluma naleli phephandaba ngobuqhawe bukawilliams ofake ibafana kowandulela owamanqamu kwi-afcon. Ibafana isizobhekana nenigeria ngolwesithathu.
“Okwenziwe nguwilliams mhlawumbe ngeke kuphinde kwenzeke futhi ngoba angikhumbuli unozinti evimba amaphenathi amane,” kusho ude Sa.
“Kufanele kube yisifundo kithina sonke singabantu baseningizimu Afrika ukuthi ukuwa uma kukhona okuzamayo, akusho ukuthi sekuphelile kepha kufanele kube sengathi kukufaka amaphiko.
“Eminyakeni eyishumi edlule, uwilliams ubhekane nenkinga emdlalweni wakhe wokuqala webafana kodwa akazange adikibale.
“Esikhundleni sokuyozivalela akhihle isililo, ubhukulile wasebenza kakhulu njengoba okuhle sekumlandela,” kuqhuba ude Sa.
“Ngiyamjabulela ngoba lokhu ukwenze ngesikhathi esikahle kwazise amaqhawe alokhu eya ngokuya eziveza emzansi kusukela kumabhokobhoko kuya kudricus du Plessis, osanda kubuya nesicoco SE-UFC.”
Uwilliams uvimba amaphenathi nje, kade esanda kuyitakula kunzima ibafana ngomzuzu wokugcina wesikhathi esengeziwe, egeza umgadli wecape Verde obephume yedwa.
Ngaphandle kwalobu buqhawe, uwilliams uphinde wafica irekhodi lokungangenelwa yigoli emidlalweni emine ye-afcon lika-andre
Arendse owayesesikwatini esisodwa node Sa ngo-1996.
Uwilliams uthe ujabule ngokuwinisa ibafana kodwa kungaba ngaphezulu uma bengayiwina indebe ye-afcon.
“Bengingeke ngikwenze ngedwa lokhu ngakho-ke ngiyakwamukela ukuthi ngikhethwe njengomdlali ongcono kodwa kimina sonke usifanele lo mklomelo.
“Okumqoka kimina wukufaka isandla ekusizeni iqembu njengoba bebelokhu benza abanye ozakwethu kuqhubeka umqhudelwano,” kusho uwilliams.
Ibafana yagcina ngo-2000 ukubhekana nenigeria kowandulela owamanqamu we-afcon ngesikhathi lo mqhudelwano udlalelwa enigeria naseghana.
Elakuleli lakhala ngaphansi ngo 2-0, lingcwatshwa ngutijani Babangida. Akubuzwa ukuthi uwilliams nozakwabo bazofuna ukusenzisa umdlalo wangolwesithathu ukuziphindisela kulezi zimbangi zeminyaka.