Kusimangazile ukuqokwa kukasopolitiki abe wundunankulu kazulu
Isizulu sithi, isiphingwe ngenkulu. Ukuba bekungenjalo umuntu ubezokuphikisa okuphikisekayo, atuse okutusekayo. Bese sikuthatha njengefagugu lethu ukuthi undunankulu wethu uqhamuka Kwaphindangene.
Ukuba ngundunankulu ngaphansi kombuso wamakhosi amathathu kwenkosi yakwabuthelezi, kuye kwasenza sabuswa wumuzwa wokuthi noma kanjani undunankulu kufanele aqhamuke okhalweni lwayo. Lokhu kukhomba ukuthi umntwana wakwaphindangene ubengundunankulu wokugcina ukuqhamuka endlini yasendlunkulu.
Le ndlela yenkosi yamakhosi, yokuqoka umuntu esikhundleni esithile, bese kuba nesekela, siyiqale ngesikhathi iqoka umdidiyeli wamabutho. Ngeke sisathini, sothula noma kunzima ukumukela lolu guquko.
Engingakusho nje ngikubhekise kunoma wubani wakwazulu-natal, wukuthi umdlokombane ubengathandi ubukhosi bukazulu bunindane nepolitiki. Wakhetha ukuzondwa nokuthukwa yiziyingayinga zakhe kunokuzibandakanya nezombusazwe.
Singakhohlwa kanjani yingoma yezingane zoma eyayithi eshell House. Zashiya ezingalazi ingane zomah enkosini yethu kuleya ngoma eyayibhinqa. Noma sase sinyamanambana kwabanye isilo, akaze agudluke ubaba wesizwe samazulu ukuphila impilo emsulwa mayelana nezombusazwe.
Sisazama ukujwayela ukuthi inkosi yethu yathi yeseka iqembu lezombusazwe. Khona lapho isiqoka usombusazwe esikhundleni esisinda kangaka!
Akusikhona ukuthi ngeya umfu Thulasizwe Buthelezi, yikho nje ukuthi sesijwayele ukuthi umuntu ophethe lesi sikhundla kube yinkosi. Kodwa-ke bakhona abathi phansi amaphaphu, isilo siyayazi kahle into esiyenzayo.