Kungenise ama-serum kwezokunakekelwa kwesikhumba
NJENGASEMFASHININI, nasemkhakheni wezokuzicwala kwabesifazane kuyaba khona uhlobo lwezimonyo ezisuke zidla ubhedu. Ngezikhathi zakudala kwake kwadlisa izimonyo ezigqamisa ibala kowesifazane, kunokhilimu ababethe chithi saka benza lo msebenzi.
Yize sibuyele lesi sitayela ezimonyweni kodwa kulokhu sibuye sesiqhamuka nezindlela eziningi ezihloliwe, okubalwa kuzo okufakwa ngemithambo ukuze kuhlanze isikhumba ngaphakathi, sigezeke sigcine sikhanya ama-drips.
Abacwali bobuso bathi njengamanje isimonyo esigqamile esibukeka sisesitayeleni kwabesifazane, sibizwa nge-serum. Yize kuthanda ukumba eqolo kodwa bathi into eyenza lolu hlobo lwezimonyo luphenduke intandokazi kwabesifazane, wukuthi kuyavela ukuthi luhlolisisiwe futhi lwenza izimanga esikhumbeni.
Cishe zonke izinkampani ezikhiqiza izimonyo zobuso kwabesifazane zinazo izinhlobo ze-serum ezizidayisayo ezitolo. Kodwa ungoti unksz Nomusa Khuboni, uthi into ebalulekile wukuthi owesifazane ofuna ukusebenzisa lolu hlobo lwezimonyo, aqale aqonde kabanzi ngesikhumba sakhe.
“Noma yini osuke ufuna ukuyisebenzisa ebusweni, kumele wazi kabanzi ngayo.
Uma ufuna ukusebenzisa i-serum, kumele wazi uhlobo lwesikhumba sakho. Ngabe yileso esomayo, esinamafutha noma esikuhlanganise kokubili,” usho kanje.
Uthe ziningi izinhlobo zamaserum abesifazane abangazenza ngazo babukeke kahle kodwa kuya ngokuthi owesifazane yini emhluphayo ngesikhumba sakhe.
Uthe ezinhlotsheni ezikhona, kukhona ezilwa nemibimbi, ukubhekelela ukuthi noma isihambile iminyaka kowesifazane kodwa isikhumba sakhe singakukhombisi lokho, phecelezi anti-aging serums, yilawo asiza ukususa amabala okungenzeka ukuthi adalwe yizinduna, ukugqamisa isikhumba esigqwalile namanye.
Echaza kabanzi ngalolu hlobo lwezimonyo, ungoti uthe amaserum anezithako ezishubile, azifani nezimonyo zokuthambisa isikhumba okwejwayelekile.
Wenze isibonelo ngamaserum okugqamisa isikhumba. Uthe wona aba nesithako uvitamin C othe esithe xaxa kulowo mkhiqizo, ukuze wenze umsebenzi wokugqamisa isikhumba ngokushesha. Ubale nama-serum enza umsebenzi wokulwa nemibimbi noma olayini abakhombisa ukuhamba kweminyaka kwabesifazane.
Uthe wona anesithako esithe xaxa sokubizwa nge-hyaluronic Acid esisiza ukugcina isikhumba sinomswakama owanele futhi sibukeka siphapheme.
“Isikhumba uma sinomswakama owanele, olayini abakhombisa ukukhula kowesifazane ababonakali kakhulu,” usho kanje.
Ubale nesithako esibizwa ngeretinol, athe abesifazane abasuke befuna ukusebenzisa i-serum kumele basibheke ukuthi sikhona futhi singakanani kulowo mkhiqizo. Uthe i-retinol yona isiza ukuthi isikhumba sikwazi ukuzikhiqizela sona okubizwa nge-collagen.
“I-collagen ikhiqizeka kalula futhi isuke iningi uma owesifazane esemncane, ngokuhamba kweminyaka iya ngokuya ishoda ekukhiqizekeni. Imikhiqizo ene-retinol, yenza omkhulu umsebenzi esikhumbeni sowesifazane ekutheni sibukeke sibushelelezi, kube nzima nokuqagela iminyaka yowesifazane ngokumbuka ebusweni,”echaza.
Ungoti ukhuthaza abesifazane ukuthi bawasebenzise ama-serum njengengxenye yokuzicwala. Uthe kodwa okubalulekile wukuthi awagcotshwa nje wodwa, bese uthi kuphelile.
“Iphutha elenziwa ngabanye wukucabanga ukuthi uma usune-serum akusamele wenze ezinye izinto esikhumbeni njengokusihlanza, ukususa isikhumba esidala (exfoliating) nokuthambisa isikhumba uphinde wengeze ngokokuvikela imisebe yelanga.
“I-serum uqala ngayo ngaphambi kokuthi ugcobe konke okunye. Asikho isimonyo kulezi
Isithombe: PINTEREST
ezingenhla esikwazi ukungena endaweni yesinye.”
Wexwayise abesifazane ukuthi baqinisekisa ukuthi bayakugcoba okokuvikela ukushiswa yilanga esikhumbeni okunospf 15 kuya phezulu.
“Ezinye zezithako ezitholakala kule mikhiqizo okukhandwa ngayo amaserums, zenza kube lula ukuthi isikhumba sishiswe yilanga. Uthole ukuthi ugcoba i-serum emba eqolo kodwa uzithole usumnyama bhuqe noma unamashubaba,” egcizelela.
Uncoma ukuthi abesifazane, kuleyo mikhiqizo abavele beyisebenzisa, babheke emashalofini ukuthi ayikho yini i-serum yakhona.