‘Ziphekwa ngomhluzi wenye’ izinkinga kulesi sikole
UMA usondela esikoleni icopesville Secondary, emgungundlovu, uzwa amaphimbo ezingane zicula emakilasini. Ungaze ucabange ukuthi lokho kuyingxenye yesifundo kanti phinde, yiyonanto eziyenzayo lize liyoshona kulezi zinsuku.
Cishe yiyona ndlela abafundi basecopesville abaqeda ngayo isizungu ngemva kohide lwezinkinga eseziholele ekutheni kume nse ukufunda lapha. Kumanje abazali bawotha ubomvu ngendaba yokukhokhiswa kwezingane imali yesikole ewu-r300 ngaphambi kokuthi zithole izincwadi.
Othisha sebekhethe ukuma ukusebenza bekhala ngokuthi akufundiseki izingane zingenazo izincwadi.
Abazali abakhulume nesolezwe ngesikhathi lihambele esikoleni izolo, bathe selokhu kuqale unyaka izingane zabo azifundi, zivukela ukuyohlala esikoleni zibuye ntambama.
Ongathandanga ukudalulwa, uthe okubakhathazayo yisikhathi esichithekayo sokufunda kanti lokho kubeka ikusasa lezingane zabo engcupheni.
“Kuthiwa asikhokhe labo R300, uma ingane yakho ingakhokhile noma ungazibophezeli ukuthi uzokhokha nini, ayinikezwa izincwadi.
“Selokhu kuqale unyaka izingane azifundi ngoba izincwadi azinazo, kangangoba uthishomkhulu uze wabiza umhlangano ngomgqibelo efuna sizibophezele ukuthi sikhokha nini,” usho kanje umzali.
Omunye umzali uthe batshelwe ukuthi imali isetshenziselwa ukukhokhela unogada oqaphe isikole.
“Thina sazi ukuthi izikole ezikahulumeni, ngakho onogada bakhokhelwa uhulumeni. Kuyasixaka ukuthi kuthiwe owalesi sikole akakhokhelwe yithina, manje thina esingasebenzi sizoyithathaphi imali,” kusho yena
Uthe izinkinga ecopesville ziqale ngonyaka odlule kucinywa ugesi okuthiwa kwenziwe umasipala ngenxa yokungakhokhi komnyango wezemfundo. Kwenzeka lokhu nje, isikole vele besingenawo amanzi isikhathi eside kodwa abuye kuleli sonto.
Umnuz Themba Mdunge, osesigungwini esengamele isikole, uvumile ukuthi ikhona imali ekhokhwayo kodwa ibizwa ngomnikelo, kuvunyelwene ngayo nabazali emhlanganweni obungomgqibelo.
“Ukukhokhwa komnikelo kwenzelwe ukuthi kukhokhelwe unogada nabahlanza isikole. Umnyango awusinikanga unogada wathi asizibonele ukuthi sihlela kanjani ukuqinisekisa ukuthi isikole siphephile, savumelana ngalokhu nabazali,” kusho umdunge.
Uqhube wathi akaphoqelekile umzali ukuthi akhokhe imali esikhaleni kodwa kumele asho ukuthi uzokhokha kanjani bese ingane yakhe inikezwa izincwadi.
Uthe kukhona abavezile ukuthi abanayo imali, bazonikela ngokwenza umsebenzi wesikole isikhathi esithile njengokusihlanza, nakho okuyinto emukelekile.
Umdunge uthe balinganiselwa ku-1 200 abafundi ababhalise esikoleni, okusho ukuthi kulindeleke ukuthi isikole siqoqe imali efinyelela ku-r360 000, ngalabo R300.
Umnuz Sibusiso Malinga, ongumengameli wenational Teachers Union, ugxeke umnyango wezemfundo esifundazweni ngokwehluleka ukubhekelela izikole zikahulumeni ngezidingo ezifanele.
“Isenzo somnyango sifaka othisha kwenkulu ingcindezi. Kufanele ngabe akekho umzali osaphoqeleka ukukhokha imali yesikole. Zonke izikhungo zikahulumeni zinonogada abakhokhelwa nguye kodwa ezikoleni abekho, okukhombisayo ukuthi akanandaba nezikole,” kusho umalinga.
Okhulumela umnyango umnuz Muzi Mahlambi, usigxekile isenzo sokukhokhiswa kwabazali bese kubanjelwa izingane izincwadi. Uthe bazothola indlela yokungenelela ukuze kuqhubeka ukufunda nokufundiswa kwezingane.