Awanekelwe izwe amagaraji anodizili-mbumbulu
KUSUKE umsindo nokwethuka kwabanye umnyango wezamandla nokumbiwayo udalula izindaba ezithi kunamagaraji okutholakale ukuthi adayisa udizili oxutshwe nopharafini.
Umnyango uthe kuhlolwe amagaraji angu-1 070 ezweni lonke, kwathi angu-70 kuwo kwatholakala ukuthi enza lo mkhuba.
Yize engadalulwa kodwa kuthiwa asabalele izwe lonke futhi amaningi awo asenorth West, Mpumalanga, Limpopo, Gauteng nakwazulunatal.
Kuhlaluke ukuthi umkhuba kawenziwa ngamagaraji adumile kodwa ngamagaraji asemasha futhi amanye awo angenazo nezimvume.
Okwenziwa ngabanikazi bala magaraji wumgolo wokubeka inzuzo phambili nokungacabangeli abanikazi bezimoto ezingafa izinjini ngalokhu.
Imoto yinto eyigugu cishe kuwo wonke umuntu onayo, ngakho ukuthi kube khona oyibeka engcupheni kungaba yishwa.
Kungesibo abashayeli kuphela abasengcupheni kodwa nabantu jikelele ngoba kunamabhizinisi athembela kuma-generator asebenza ngodizili uma kucima ugesi nawo alengela engozini yokufa.
Intengo yelitha likaphethroli nodizili ilawulwa nguhulumeni, okungaba yimbangela engenza abanikazi bamagaraji bangene esilingweni sokwandisa umthamo ngopharafini.
Kulo lelo litha, uhulumeni ubamba intela ebizwa nge-general Fuel Levy ne-road Accident Fund. Leyo ntela uma ihlanganisiwe ilinganiselwa ku-r6. Kuphinde kube nezindleko zokuthutha lowo phethroli noma udizili nezinye, okungenza umnikazi wegaraji angatholi imali etheni ngelitha.
Yilokho-ke okungenza osomathuba bandise ngopharafini. Ngaleyo ndlela benza inzuzo ethe xaxa futhi nezwe lilimale ngoba intela bayayibalekela. Kuthiwa ilinganiselwa ku-r3 billion imali elahlakayo emnothweni ngalesi senzo.
Asithembe ukuthi lolu daba luzosukunyelwa, bajeze kanzima abenza lo mkhuba futhi banekelwe izwe.