Isishela isinyenyela ebaxoshile: Safpu
IBAFANA Bafana isesimweni esifanele ngokomqondo ukubhekana netunisia, emdlalweni wanamuhla omqoka wegroup E we-africa Cup of Nations (Afcon) esingena kuvuthondaba e-ivory Coast.
Lokhu kuvezwe ngumdlali wasemuva, ugrant Kekana nomqeqeshi, uhugo Broos, abebenesithangami nabezindaba izolo lapho bebegeqa khona amagula ngezinhlelo zalo mdlalo, ozoba ngo-7 ebusuku e-amadou Gon Coulibaly Stadium, ekorhogo.
Ibafana inethuba lokuzifaka kwi-last 16 ye-afcon ngokunqoba itunisia eza kulo mdlalo nayo imelwe wukunqoba noma kanjani, kwazise uma yehluleka izoliwasha ekuseni ijezi, yize inomlando wokudla lesi sicoco ngo-2004.
Ukekana ubalwa namaqhawe emdlaweni webafana nenamibia, ewunqobe ngo 4-0 ngesonto, okuyiwona futhi obuyise ithemba eqenjini likabroos eliqale ngokuhlulwa yimali ngo 2-0.
Imali ibambane netunisia kowayo wesibili kanti leli qembu elibhekene nebafana liqale ngokushaywa yinamibia ngo 1-0. Imali, ezobhekana nenamibia, ihlezi phezulu kugroup E futhi yiyona kuphela enesiqiniseko sokuthi isingenile kwi-last 16.
Kusengenzeka noma yini kuleli qoqo kodwa ukekana akangabazi ngokufanele bakwenze futhi akubona kozakwabo kubaqinisa idolo.
“Wonke umuntu okhona ekhempini uvuselelekile ngenxa yomphumela odlule futhi sonke siwulindele, siwulungele umdlalo wetunisia,” kusho ukekana esithangamini ebesihlelwe YI-CAF.
“Ukuzethemba kuphezulu kithina sonke kodwa siyaqonda ukuthi sibhekene nelinye lamaqembu esizwe amakhulu e-afrika.
“Akekho kithina ozimisele ngokuwasha ijezi ekuseni, kumbe ukubuyela ekhaya, ngakho-ke sizokwenza konke okusemandlani ukuthi sithola umphumela odingekayo,” kuthembisa isitobha semamelodi Sundowns.
Ibafana imelwe wukugwema ukushaywa bese ifeza iphupho likabroos.
“Isihibe sokuqala bekuwukudlulela kweye-last 16 ngakho-ke siyazi ukuthi sisethubeni lokuzifaka ngomphumela omuhle kowetunisia,” kusho ubroos.
“Ngeke silenze iphutha lokubuka isitha sethu esilandelayo ngomphumela esiwuthole kwinamibia ngoba ibuye yavela itunisa yangempela
sebebhekene nemali.
Siyazi ukuthi umdlalo uzoba nzima kodwa lokhu singakuguqula uma singenza okufanele ngesikhathi esifanele,” kusho ubroos.
Uma ibafana idlulela kwi-last 16, izojoyina amanye amazwe asevele azibekisele indawo, okukhona kuwona i-equitorial Guinea,
Nigeria, Cape Verde,
Egypt namanye. Ngeafcon ka-2019, ibafana yakhishwa yinigeria kuma-quarterfinal.
“Ukuzethemba kuphezulu ekhempini ngenxa yomphumela wenamibia, ngakho-ke sizimisele ukuqhubeka ngomgqigqo ofanayo.
“Okokuqala ukuqinisekisa ukuthi asehlulwa kulo mdlalo ngoba lokho kukodwa kwanele. Kufanele sidlalele ukuwina ngoba ngeke sazi ukuthi kuzokwenzekani kweminye imidlalo ethinta iqoqo lethu,” kuphetha ubroos.
IZIKHULU zemoroka Swallows zimatasa esithe, zinxenxa abadlali ezibaxoshile ukuthi basayine izinkontileka ezintsha ngenhloso yokubaholela amakinati.
Lokhu kudalulwe ngumengameli wesouth African Football Players
Union (Safpu), uthulaganyo Gaoshubelwe, esithangamini nabezindaba ebesisegoli, ngolwesibili, lapho le nyunyana ebicacisa khona ngezinyathelo ezozithathela leli qembu ngenxa yokuxosha abadlali abawu-22.
Iswallows ixoshe laba badlali ibasola ngokungenela esiteleka samaholo esiholele ekutheni iqembu lingalubhadi emdlalweni wemamelodi Sundowns nakowelamontville Golden Arrows ngodisemba. Ngenxa yalokhu ipremier Soccer League (PSL) ihlawulise iswallows isigidi samarandi, kwalengiswa ur600 000.
Iphinde yayiphuca amaphuzu, yawanikeza izimbangi eziphinde zagixabezwa nangamagoli amathathu iqembu ngalinye.
Isinqumo sokuxoshwa kwale nqwaba, iswallows isithathe ngemuva kwesithangami sokuqulwa kwamacala alaba badlali.
“Singakuqinisekisa ukuthi laba bantu (izikhulu zeswallows) njengamanje banxenxa abadlali ababaxoshile ukuthi basayine izinkontileka ezintsha. Sikhuluma nje, kuze kube yimanje iswallows ayikakasiniki isinqumo esithathile. Lokhu kokuthi kuxoshwe abadlali kwakuyisiphakamiso sikasihlalo wesigungu seqembu sokuqula amacala. Akusona eseqembu. Uma kuze kuphela usuku lwanamuhla (ulwesibili) bengabuyelanga kuthina, udaba silufaka kwipsl Despute Resolution Chamber (DRC),” kubeka ugaoshubelwe.
Uqhube wathi: “Sayizwa nje iswallows isikhohlisa, ithi usihlalo wekomiti layo eliqula amacala wayezimele, engathathi hlangothi. Ayikho into enjalo, siyazi ukuthi bese sikade sathathwa isinqumo sokuxosha abadlali. Ngale nto abayenzayo yokufuna abadlali basayine izinkontileka ezintsha bazama ukwenza ubuqili. I-DRC yiyo ezosinika isinqumo esicacile".
Lo mengameli uphinde wasola usihlalo weswallows, udavid Mogashoa, ngokuqambela abadlali amanga ngokuthi benqaba ukuya emdlalweni wesundowns nakowe-arrows.
“Ngodisemba 26, izikhulu zeswallows zasishayela ucingo zisazisa ukuthi zisola ukuthi abadlali ngeke baye emdlalweni wesundowns. Sahlangana nabadlali sabacela ukuthi baye kulo mdlalo.
Nabo bathola imiyalezo eyayibayalela ukuthi baphathe izinto zokudlala. Kuthi sebefike ezindlini zeqembu bathola ukuthi umogashoa usebhalele IPSL ukuthi kabezuphumelela kulo mdlalo. Nakhona iswallows yayingashongo ukuthi ngobani abadlali abawu-20 abazoya kulo mdlalo. Bengazi lutho abadlali, uphinde wabhuntshisa owearrows. Sizokwenza konke okusemandleni ukuphikisa lesi sinqumo esinonya,” kuqhuba umengameli.
Imizamo yokuthola umogashoa ayiphumelelanga kwazise ubengaluphenduli ucingo lwakhe. Akawuphendulanga nomyalezo ashiyelwe wona.