I-SABC ivale u-owen ukusebenzisa uphawu lwayo
OWABA sematheni ngombango WE-SABC Summer Song, u-owen Ndlovu ekhala ngokudliwa kwamandla akhe YI-SABC, usevaliwe ukusebenzisa uphawu lwesikhondlakhondla esisakaza ngomoya.
Lokhu kuza emva kokuthi u-owen efake isithombe esinophawu LWESABC ekhasini lakhe le-facebook, wathi I-SABC Summer Song iyabuya njengoba kungu-2024.
I-SABC imbhalele incwadi imazisa ukuthi akayeke ukusebenzisa uphawu lwayo emikhankasweni yakhe.
“Sicela uyeke futhi ungaphinde usebenzise uphawu LWE-SABC emikhankasweni yakho. Uphawu LWESABC lubhaliswe ngokusemthethweni ukuthi wolwayo futhi kuvumeleke yona (I-SABC) kuphela ukuthi ilusebenzise.
Kuphinde kube yiyona
I-SABC ekhokhela ukuthi ikwazi ukulusebenzisa. Sizocela ukuthi usibhalele uvume ukuthi awuzoqhubeka nokulusebenzisa ngoba awuvumelekile.
Uma uqhubeka kuzophoqeleka ukuthi ubhekane nengalo yomthetho, okungaholela ekutheni ugcine uhlawuliswe imali ngalokho,” kusho incwadi YE-SABC ebhekiswe ku-owen.
Ethintwa u-owen, uyiqinisekisile eyencwadi ukuthi ubhaleliwe yona. Uthe okwamanje akazokwazi ukuphawula ngayo kodwa useyidlulisele kubameli bakhe, okuyibona abazoyicubungula bese beqhamuka nesinqumo.
Umbango ophakathi kuka-owen NE-SABC, usunesikhathi ukhona njengoba kunonyaka okwake kwamiswa ngawo ingoma ehlukanisa unyaka ngenxa yamaphepha ayewafake enkantolo.
Wayekhala ngokuthi umqondo wengoma ehlukanisa unyaka ungowakhe njengoba ubuwaziwa nge-summer Song of the Year.
Phambilini ecacisa ngomncintiswano, u-owen waveza ukuthi kuzona zonke iziteshi ZE-SABC, zazingavotelwa izingoma ezizoba sembangweni wokuhlukanisa unyaka.
Uthe kwakuba yisinqumo sabaphathi balowo msakazo ukuthi yimuphi umculi abambona ethandwa ngabantu, bese ingoma yakhe ihlukanisa unyaka. Kuze kwaba wu-2016 ngesikhathi esenenkontileka NE-SABC lapho kuqalwe khona ukuthi kuvotelwe ingoma ezohlukanisa unyaka.