Ubroos ubona ingozi kwimali
UMQEQESHI webafana Bafana, uhugo Broos, akaliboni njengomqansa ongaphezu kwamandla iqoqo abafakwe kulona kwi-africa Cup of Nations (Afcon) eqala ngomgqibelo e-ivory Coast kodwa womathathu amanye amazwe akulona anobungozi ngokwahlukana kwawo.
Ngokusho kukabroos obedlana indlebe nethimba labezindaba lesouth African Football Association (Safa), ngeke kube lukhuni kangako ukubalwa namazwe amabili azodlulela kwilast 16 kugroup E kodwa iqembu lakhe kunezinselelo okufanele lizeqe.
Ibafana ezozwana amandla nelesotho kusasa epitoli ngaphambi kokulubangisa e-ivory Coast (ngolwesine), iboshelwe kugroup E nemali, Tunisia nenamibia.
Enye yezingqinamba ezinkulu ngokwalo mqeqeshi wasebelgium, wumdlalo wokuqala nemali ngojanuwari 16 ngo-10 ebusuku e-amadou Gon Coulibaly Stadium, ekorhogo.
Nakuba ukhona uphawini wokudlulela esigabeni esilandelayo njengezwe elingcono kwaphume isithathu eqoqweni kodwa, ubroos uyaziwa ukuthi uwuhlobo lomqeqeshi ozofuna iqembu lakhe libalwe namabili adlula ngegunya hhayi ngoba sekushaywa izibalo.
Lo mqeqeshi onomlando wokusidla lesi sicoco necameroon, ushumayele elokuzibamba ziqine kowokuqala ngesikhathi ekhuluma esestellenbosch Academy kuleli sonto.
“Inhloso yethu yokuqala wukudlulela kwilast 16 kodwa siyaqonda ukuthi kuzoba wumqansa, ikakhulukazi emdlalweni wokuqala nemali okufana nokuthi idlalela ekhaya kwazise isondelene kakhulu ne-ivory Coast,” kusho ubroos, ongangabazi ukuthi le nkundla emumatha abantu abangu-20 000 izobe ichichima abantu basemali.
Nomphumela wakamuva wemali lapho ilobole khona iguinea-bissau ngo 6-2 kowobungani ngempelasonto, kufanele ukuthi umethusile ubroos.
“Nakuba ngikholelwa ekutheni akulona iqoqo okulukhuni satshe ukuphuma kulona kodwa yonke imidlalo yethu inzima uma uzobheka umlando wamazwe esibhekene nawo kulona. Amaqembu esiqhathwe nawo ahlale eyingxenye ye-afcon, okuyinto ezikhulumelayo iyodwa futhi awagcini ngokwandisa izibalo kodwa ajwayele ukuhamba ibanga elide, okufakazelwa wokwenziwe yitunisia kowendebe yomhlaba eqatar ngo-2022,” kuqhuba umqeqeshi.
Uxwayise nangengozi yokungayinaki inamibia, ekhula ngesivinini futhi egqishe ngabadlali abalazi ukusuka nokuhlala iqembu lakhe. Inamibia inenqwaba yabadlali BE-PSL esikwatini sayo.
“Sidlale nayo muva nje inamibia, ngakho-ke ubungozi bayo ngiyabazi. Ibophele abadlali abagijima emaqenjini akuleli futhi ngendlela abakhula ngesivinini ngayo bangamangaza abaningi kuleli qoqo,” kusho yena.
Uyavuma ubroos ukuthi konke kubukeka kunzima kodwa uyakholwa wukuthi ikhona indlela yokwenza kahle kodwa konke kulele ekutheni abadlali bangazongi.
“Uma sizokwenza lokhu ebesikwenza eminyakeni emibili edlule, akhona amathuba okuthi sikuthole esikudingayo kuleli qoqo,” kuphetha ubroos.