Lumphazamisa emsebenzini womphakathi olwesihlalo esinamasondo esigugile
INTOKAZI ekhubazekile yase-oliviershoek, ebergville, unosiphiwe Khumalo, ifuna umsamariya olungileyo ozoyithengela isihlalo esinamasondo esihamba ngogesi ngoba, asisebenzisayo sesisidala kakhulu.
Unosiphiwe (37), uke wabamba iqhaza ekomitini lentuthuko yasendaweni ahlala kuyo e-ward 8 kumasipala wasokhahlamba kodwa wagcina ehoxile ngenxa yokuhlushwa yisihlalo.
Uthe umatasatasa nenhlangano yakhe engenzinzuzo ahlose ngayo ukuvumbulula ikhono kubantu abakhubazekile abahlala ngaphansi kukamasipala wasothukela nokuqwashisa ngamalungelo abantu abakhubazekile, i-onesiphiwo Foundation.
"Kudingeka ngihambele abantu abakhubazekile futhi ngihlangane nezikhulu ezithize kodwa angikwazi ngoba le-wheelchair iyangihlupha. Amasondo ayo abuye angakwazi ukuhamba. Nendawo engihlala kuyo kuhambeka kabuhlungu uma lina. Kufanele ngabe kunetiyela elingena ekhaya kodwa akukho engingakwenza ngoba anginawo amandla."
Uthe usengqongqoze kubantu abaningi abasemandleni kodwa akakutholi ukusizakala.
"Kunabaholi abaphezulu asebeke bafika ekhaya, bangithembisa izulu nomhlaba kodwa bagcina bengazifezanga izithembiso zabo. Ukube nginemali ngabe ngithenga ngisho imoto bese ngiqasha umuntu ozongishayelela ukuze ngehle ngenyuka, ngisize abanye abakhubazeke njengami."
Uthe akaboni ukuthi uyokwazi ukuyovota njengoba engasizakali kuhulumeni.
"Ngale nhlangano engiyiqalile, i-onesiphiwo Foundation, ngihlose ngayo ukuxwayisa abantu nentsha yasendaweni ngezindlela ezahlukahlukene zokukhubazeka nokuthi kuphilwa kanjani nabantu abakhubazekile.
Ngihambele amakhaya, amakliniki, izikole, izinhlangano ezisiza umphakathi ezizimele nezingaphansi kukahulumeni, amasonto nemihlangano yemiphakathi ejwayelekile.
Ngifundise nangamalungelo abantu abakhubazekile abanawo beyizakhamizi zezwe nendima engakhathulwa ngamalungu omphakathi ukubavikela abantu abakhubazekile."
Uthe i-wheelchair kagesi ibiza Imali engaphezu kur40 000 kodwa ingenza omkhulu umehluko empilweni yakhe nasemphakathini.
"Sengize ngamila izilonda ngenxa yokuthi isikhathi esiningi ngisichitha ngilele embhedeni ngoba angikwazi ukuhamba.