Baphungwa ngezithebe abazisikela amavenge ezikhundleni zemk
I BAMBA likanobhala jikelele womkhonto wesizwe, umnuz Thanduxolo Gorbachev Dyodo, lithi hlehla bheseni akukaphakwa kulabo abangamaqatha aziqobayo, abazikhombela izikhundla eziphezulu eqenjini. Udyodo ukhiphe incwadi eshubile, ekhalima amalungu okuthiwa aseqalile azibiza ngobuholi obuphezulu. Umkhonto wesizwe usalokhu uyindaba egudwini, kuphuzwa ngawo itiye nasematshwaleni kuqhutshwa usuku ngawo. Leli qembu lethulwe sesivele siqalile isiyaluyalu sokhetho lukazwelonke oluzoba nonyaka. Owayengumengameli wezwe, umnuz Jacob Zuma, ngodisemba wonyaka odlule, wethule iqembu umkhonto wesizwe, wamemezela ukuthi usehamba nawo. Uzuma walibeka ngembaba elokuthi ngeke esayikhankasela I-ANC futhi ngeke ayivotele kodwa uzotheza abantu abavotela I-ANC bavotele iqembu elisha. Emuva kwalokho, kube nesasasa ezingxenyeni eziningi zezwe, abantu belandela uzuma. Kwayena uzuma akanasinqe kulezi zinsuku, uphansi phezulu uhamba eshumayela ivangeli lomkhonto wesizwe, akezwa ngisho imvula ebhilitile. Umkhonto wesizwe ubungakayi engqungqutheleni yokukhetha ubuholi bayo futhi bekungakacaci ngezinhlaka zayo zesikhashana. Okuningi bekungakaziwa ngaleli qembu kodwa lilokhu lisabalale okomlilo wequbula. Akucaci futhi nokuthi wubani abazohlasela ngaye njengomengameli uma sekuvotwa okhethweni oluzoba kulo nyaka. Uzuma kodwa ubonakala ephambili emkhankasweni yeqembu, wuyena oba yisikhulumi esiqavile uma kunemicimbi. Udyodo uthe uyazi ngalabo asebehambe bekhukhumala bezibiza ngabaholi abaphezulu nokuyinto ayikhuzayo. “Kuyasikhathaza ukubona uhlu lwamagama ezinkundleni zokuxhumana lapho abantu abathile bezibiza khona ngabaholi abaphezulu abayisithupha. Uhlu lolo alukhishwanga yikomiti lesikhashana lenhlangano futhi siyazihlangula kulona,’’ kusho udyodo. Uthe amalungu awozihlupha ngokuphenya uma kukhona akubonayo abuze nasezinhlakeni ezifanele angahambi elalela amawongowongo. “Uma kukhona enifuna ukukwazi ngezinhlelo zomkhonto wesiwe, thintani izinhlaka zawo ukuze nigweme imikhuba emibi, nibuze kubantu abafanele,’’ kusho udyodo.